Լեռնային Ղարաբաղի հակամարտությունը այլեւս սառեցված համարել չի կարելի: Նման կարծիք է հայտնել Բրուքինգզ ինստիտուտի եվրասիական հարցերով փորձագետ Ֆիոնա Հիլը «Ամերիկայի Ձայն»-ի հայկական ծառայության հետ զրույցում:
«Ակնհայտ է դառնում, որ շփման գծում կրակոցներն ու զոհերի թիվը շարունակում է աճել, իսկ Ադրբեջանն ակտիվորեն պատրաստվում է նոր պատերազմի: Հայաստանում ռուսական կայազորի ներկայությունը երկարաձգելու վերաբերյալ համաձայնագիրը կարող է ինչ որ չափով զսպող հանգամանք լինել, սակայն դրան զուգահեռ Ռուսաստանի նախագահն այցելում է Բաքու եւ զինում նաեւ հակամարտության այս կողմին, ինչը էլ ավելի է մեծացնում հնարավոր նոր պատերազմի հավանականությունը» ,- նշել է Հիլը:
Ըստ փորձագետի՝ Միացյալ Նահանգները պետք է առավել կարեւորի Լեռնային Ղարաբաղի խնդիրը, քանի որ նոր պատերազմը կործանարար կլինի ինչպես տարածաշրջանի, այնպես էլ ընդհանրապես աշխարհում գլոբալ անվտանգության տեսանկյուններից: