Դոնալդ Թրամփը՝ ԱՄՆ-ի 45-րդ նախագահ: Նոյեմբերի 8-ին կայացած ընտրություններում Հանրապետական կուսակցության թեկնածուին հաջողվեց առաջ անցնել դեմոկրատ թեկնածու, նախկին պետքարտուղար Հիլարի Քլինթոնից: Վերջինն արդեն զանգահարել է մրցակցին եւ ընդունել պարտությունը: Թրամփը Սպիտակ տան ղեկավարի պաշտոնը կստանձնի 2017 թվականի հունվարի 20-ին:
Թրամփն արդեն շնորհավորանքներ է ստանում ինչպես երկրի ներսում, այնպես էլ արտերկրից: Օտարերկրյա ղեկավարներից ոչ բոլորն են, սակայն, ոգեւորված Թրամփի ընտրվելու փաստից: Գերմանիայի արտգործնախարարը, մասնավորապես, հայտարարել է, որ ԱՄՆ նոր նախագահի պաշտոնավարման տարիներին այդ երկրի արտաքին քաղաքական կուրսն անկանխատեսելի կլինի, Վաշինգտոնն ավելի հակված կլինի միայնակ որոշումներ կայացնել: Ֆրանսիայի նախագահի կարծիքով էլ՝ ԱՄՆ նախագահական ընտրությունների արդյունքը սկիզբ է դնում անորոշությունների շրջանի, ինչի մասին հարկավոր է պարզ եւ հստակ հայտարարել: Իսկ Ռուսաստանի նախագահը, շնորհավորելով նորընտիր պաշտոնակցին, հայտարարել է, որ Մոսկվան պատրաստ է ամեն ինչ անել՝ Վաշինգտոնի հետ հարաբերությունները զարգացման կայուն ուղի վերադարձնելու համար:
Մինչ այդ, ամերիկյան մի շարք քաղաքներում Դոնալդ Թրամփի հակառակորդները ցույցեր են կազմակերպել՝ հայտարարելով, որ նրան իրենց նախագահը չեն համարում: Արձագանքել են նաեւ սոցցանցերի օգտատերերը: Twitter-ում նոր հիթ է դարձել #ՆաԻմՆախագահըՉէ (#HesNotMyPresident) հեշթեգը:
Հովիկ Աբրահամյանը, Գագիկ Խաչատրյանն ու Գեւորգ Կոստանյանն այլեւս չեն պայքարի կոռուպցիայի դեմ: Կոռուպցիայի դեմ պայքարի խորհրդի անհատական կազմը փոփոխվել է: Նախկին պաշտոնյաներին խորհրդում կփոխարինեն վարչապետ Կարեն Կարապետյանը, ֆինանսների նախարար Վարդան Արամյանն ու գլխավոր դատախազ Արթուր Դավթյանը:
Թունավորում՝ մահվան ելքով: Եղվարդից այսօր շմոլ գազից թունավորմամբ Երեւան տեղափոխված 21-ամյա Անի Թադեւոսյանը հիվանդանոցում մահացել է: Աղջկա հետ հոսպիտալացված հայրը՝ 59-ամյա Արամ Թադեւոսյանը, ամբուլատոր բուժօգնություն է ստացել եւ իր ցանկությամբ դուրս գրվել հիվանդանոցից:
Կորած ձկնորսներից մեկի՝ Արեւշատ Առաքելյանի դին գտել են: 10 օր առաջ Սեւանում կորել էին Գեղարքունիքի մարզի Նորատուս գյուղի երկու բնակիչներ՝ 25-ամյա Ամուր Կյուրեղյանը եւ 24-ամյա Արեւշատ Առաքելյանը: Կյուրեղյանի մարմինը շարունակում են որոնել: Մինչ այդ փրկարարները Սեւանա լճում հայտնաբերել էին մոտորանավակը, որով նորատուսցի երիտասարդները ձկնորսության էին դուրս եկել:
Ադրբեջանում 2014 թվականին օգոստոսին գերության մեջ մահացած Կարեն Պետրոսյանի գործով իրավապաշտպանների եւ փաստաբանների խումբը դիմել է Մարդու իրավունքների եվրոպական դատարան։ Արտակ Զեյնալյանի խոսքով՝ վիճարկում են կյանքի իրավունքի խախտման իրավաչափությունը։ Հայկական կողմի պնդմամբ, Կարեն Պետրոսյանին Ադրբեջանում դաժանաբար սպանել են, իսկ Բաքուն վստահեցնում է, որ նա, իբր, մահացել է սրտի անբավարարության հետեւանքով։ ԱԱԾ-ում 2 տարի տեւած նախաքննությունից հետո որեւէ պաշտոնական տեղեկատվություն չի տրամադրվում, թե վերջապես ինչ հանգամանքներում եւ ինչպես է մահացել Տավուշի մարզի Չինարի գյուղի երիտասարդ բնակիչը։
Հայաստանի ազգային հավաքականի ավագ, անգլիական «Մանչեսթեր Յունայթեդ»-ի կիսապաշտպան Հենրիխ Մխիթարյանը՝ ՅՈՒՆԻՍԵՖ-ի բարի կամքի դեսպան: Մխիթարյանը ՄԱԿ-ի Մանկական հիմնադրամին օժանդակելու է երեխաների կրթություն ստանալու իրավունքն առաջ մղելու գործում, բարձրաձայնելու է Հայաստանի առավել կարիքավոր երեխաների իրավունքների մասին: Նշանակումը նվիրված է ՅՈՒՆԻՍԵՖ-ի 70-ամյակին:
Նոյեմբերի 9-ին դոլարի վերելքը կանգ է առել: Արդյունքում դոլարի փոխարժեքը կազմել է 478 դրամ, եվրոյինը՝ 528, ռուբլունը՝ 7 դրամ 50 լումա, ֆունտինը՝ 592 դրամ։
Նոյեմբերի 10-ին հանրապետության տարածքում սպասվում է առանց տեղումների եղանակ: Օդի ջերմաստիճանն աստիճանաբար կբարձրանա 1-2 աստիճանով: Երեւանում նույնպես վաղը տեղումներ չեն սպասվում: