Վալերի Պերմյակովի գործով Վերաքննիչ դատարանում դատական նիստը սկսվեց գործընթացին փաստաբան Էդուարդ Աղաջանյանի մասնակցության իրավասության հարցի եկարատեւ քննարկումով:
Պարզվում է, որ երեք օր առաջ ամբաստանյալ Վալերի Պերմյակովը դիմում է ներկայացրել այն մասին, որ առաջին ատյանի դատարանի վճռի ոչ մի կետով բողոք չունի: Ըստ դիմումի՝ Պերմյակովը դատարան չի ներկայացել սեփական ցանկությամբ:
Վալերի Պերմյակովի՝ բողոքարկելուց հրաժարվելը, ըստ փաստաբան Էդուարդ Աղաջանյանի, կասկածի տակ է դնում իր լիազորությունները: Իր պաշտպանյալից անձամբ ցանկությունները պարզել նա չի կարողացել, այդ պատճառով դատարանին է խնդրել անել դա: Առավել եւս, որ հանրային պաշտպանի կարգավիճակում ինքը իրավասու էր Պերմյակովին պաշտպանել միայն առաջին ատյանի դատարանում: Փաստաբանի կարծիքով, եթե Պերմյակովը հրաժարվել է բողոքել, հնարավոր է, որ նա չի ուզում, որ ինքը ներկայացնի ամբաստանյալի շահերը: Ավելին՝ փաստաբանը կասկածի տակ է դրել պաշտպանյալի դիմումի իսկությունը եւ կարծում է, որ անհրաժեշտ է Պերմյակովին դատարան բերել եւ տեղում պարզել, թե ինչ է ուզում:
Դատարանը փաստաբանի դիրքորոշման հետ չհամաձայնեց: Դատավորը հիշեցրեց, որ մեղադրյալը չի ուզում ներկա լինել եւ համապատասխան դիմում է ներկայացրել: Դատավորի դիրքորոշման հետ համաձայնեց դատախազը:
Տուժողի ներկայացուցիչների կարծիքները տարբեր էին: Փաստաբան Լուսինե Սահակյանի խոսքով՝ առկա են տարաձայնություններն այն հարցում, որ ամբաստանյալը հրաժավել է բողոքել, բայց բողոքն ամեն դեպքում ներկայացվել է: Թեպետ Պերմյակովի վարքը սպասելի էր, այդուհանդերձ անհրաժեշտ է պարզել ինչպես նրա դիրքորոշումը, այնպես էլ այն, թե դիմումն արդյոք ինքնակամ է գրվել: Տեղից ռեպլիկի համար փաստաբան Միհրան Պողոսյանի նկատողություն արվեց: Իրավապաշտպան Արթուր Սաքունցի խոսքով՝ Պերմյակովի բացակայության պարագայում անհնար է հասկանալ իրավիճակը:
Փաստաբանները նշեցին, որ Պերմյակովը պաշտպանության իրավունք ունի, քանի որ բազայում նրա վրա կարող են ճնշում գործադրել:
Դատավորի հարցին, թե փաստաբանն արդյոք խնդիրներ ունեցել է պաշտպանյալի հետ առանձին հանդիպումների ժամանակ, փաստաբանն ասաց, որ հանդիպել է նրան դատական նիստերի ժամանակ, դրանից բացի, անհրաժեշտություն չի եղել:
Քննարկումների արդյունքում դատարանը վճռեց հետաձգել նիստը, փորձել ապահովել ամբաստանյալի ներկայությունը եւ փաստաբանին հանձնարարեց հանդիպել պաշտպանյալի հետ եւ պարզել նրա դիրքորոշոմը: Եթե փաստաբանի եւ պաշտպանյալի հանդիպումների հետ կապված խնդիրներ առաջանան, դատարանը պարաստ է միջնորդել դրա կազմակերպման համար:
Դատական նիստը կկայանա նոյեմբերի 18-ին՝ ժամը 12-ին: