Ազգային ժողովի հերթական քառօրյայի առաջին օրվա քննարկումների հիմնական թեման զոհված եւ հաշմանդամ զինծառայողների ընտանիքների ապահովագրական ֆոնդին քաղաքացիների աշխատավարձերից 1.000-ական դրամի վճարման հարցն է եղել: Վիգեն Սարգսյանը նախ տեղեկացրել է. պաշտպանության նախարարությունն արդեն նամակներ է ստանում նախագիծը սատարող քաղաքացիներից:
Մի շարք ընտանիքներ, սակայն, կազատվեն վճարում կատարելու պարտավորությունից:
Խաչատուր Քոքոբելյանը պաշտպանության նախարարին է փոխանցել հասարակության շրջանում տարածվող մտավախությունը. նման հիմնադրամ է ստեղծվում, որովհետեւ պատերազմ է լինելու: Պատգամավորը վստահ է, որ նման վտանգ չկա, բայց ցանկացել է, որ նախարարն անձամբ փարատի կասկածները:
Պատգամավորը նաեւ հայտարարել է, որ բանակին օգնություն պետք է հավաքել ոչ թե աղքատներից, այլ պատասխանատվության կանչել ստվերային բիզնեսը: Նրա կարծիքով՝ չի կարելի նույն գումարը գանձել համեստ աշխատավարձերից եւ խոշոր պաշտոնյաներից կամ ձեռներեցներից:
Վիգեն Սարգսյանի ելույթում Արամ Մանուկյանի ուշադրությունը գրավել է նվիրատվություն բառը: Ասում է՝ նվիրատվությունը կամավորություն է ենթադրում, իսկ այս օրինագծով քաղաքացիներին լրացուցիչ բեռ է պարտադրվում. գուցե հարկավոր է պետբյուջեո՞ւմ լրացուցիչ միջոցներ գտնել եւ տրամադրել ծրագրի իրականացմանը:
Նաիրա Զոհրաբյանին էլ հետաքրքրել է, թե ինչպես են ծախսվել արդեն գոյություն ունեցող նմանատիպ մյուս հիմնադրամների, օրինակ՝ «Մարտիկ» հիմնադրամի միջոցները: Ասում է՝ դրա շուրջ աղմուկը չի դադարում:
Նախարարը, սակայն, խուսափողական պատասխան է տվել՝ նշելով, թե հաջողված եւ չհաջողված հիմնադրամներ կան, եւ յուրաքանչյուրին կարելի է պատասխանատվության կանչել՝ ծախսած միջոցների շարժը հասկանալու համար։ Ինչ վերաբերում է կոնկրետ «Մարտիկ»-ին. Վիգեն Սարգսյանը խոստացել է անպայման հետաքրքրվել:
Պատգամավոր Տիգրան Ուրիխանյանին բոլորովին այլ հարց է հուզում. նա Ազգային ժողովի խոսնակից կրկին փորձել է պարզել, թե ինչու Հանրային հեռուստատեսությունը չի ցուցադրում իր ելույթները:
Նոյեմբերի 13-ին Արցախում զոհվել է 1995 թվականին ծնված զինծառայող Վարդան Հովհաննեսի Առաքելյանը: Նախնական տվյալներով՝ N մարտական դիրքում հերթապահող կրտսեր սերժանտը խախտել է մարտական հերթապահության կանոնները, իրեն ամրակցված ինքնաձիգով կրակոցներ է արձակել նույն զորամասի մեկ այլ մարտական դիրքի ուղղությամբ, ինչի հետեւանքով շարքային Առաքելյանը մահացու հրազենային վիրավորում է ստացել: Քրեական գործ է հարուցվել, պարզվում են զինծառայողի մահվան բոլոր հանգամանքները: Վարդան Առաքելյանը հետմահու պարգեւատրվել է «Մարտական ծառայություն» մեդալով։ Նշենք, որ Առաքելյանների ընտանիքն ապրում է սոցիալապես ծանր պայմաններում: Ընտանիքը կորցրել է բանկում գրավադրված տունը, հիմա էլ պահանջում են ազատել Արազափ գյուղում վարձակալած տունը: Առաքելյանները երեք որդի ունեին. ավագն ավարտել է ծառայությունը, իսկ Վարդանը եղբոր հետ ծառայում էր Արցախում:
2014 թվականի նոյեմբերի 12-ին ադրբեջանական զինուժի կողմից խոցված Մի-24 ռազմական ուղղաթիռի անձնակազմի զոհված անդամներից Ազատ Սահակյանի ծննդավայր Չարենցավանում բացվել է 1990-ից մինչ օրս զոհված 33 հայ օդաչուների հիշատակին նվիրված հուշարձանը: Հեղինակը հայկական զինված ուժերի զինծառայող, կրտսեր սերժանտ Սամվել Սարգսյանն է: Հուշարձանը բացել են Մի-24-ի անձնակազմի զոհված հրամանատար, մայոր Սերգեյ Սահակյանի որդիները՝ Արթուրն ու Ալեքսանդրը, եւ արցախյան ազատամարտում զոհված ռազմական օդաչու Իոսիֆ Միքայելյանի որդին՝ Մամիկոնը:
Հրաձգություն Շենգավիթի «Լիա» գեղեցկության սրահում: Երեք երիտասարդներ տեղափոխվել են հիվանդանոց, ավելի ուշ նրանցից երկուսը մահացել են: Դեպքի առթիվ քրեական գործ է հարուցվել: Գեղեցկության սրահը պատկանում է ոմն «չարբախցի Գեղամի»: Մահացածներից մեկը 25-ամյա Գեւորգ Ավետիսյանն է: Մայրը պատմել է, որ որդին տանը հաց էր ուտում, երբ ծանոթներից մեկը զանգահարել եւ կանչել է: Կինը չգիտի, թե իր որդին ինչ կապ է ունեցել գեղեցկության սրահի տիրոջ եւ այնտեղ ծեծկռտուք սկսած անձանց հետ: Հիվանդանոցի վերակենդանացման բաժանմունքում գտնվող Արամ Պետրոսյանի վիճակը կայուն ծանր է: Որոշ տեղեկություններով՝ վիճաբանությունը ծագել է փողի պատճառով, «չարբախցի Գեղամի» եւ «Ճվճվ Արոյի» տղաների միջեւ: Բնակիչներն ասում են՝ այստեղ հաճախ են քրեական դեմքեր հավաքվում եւ «փողի ռազբորկա» անում:
Մոսկվայի հիվանդանոցներից մեկում մահացել է Անդրեյ Դավիդյանը: 60-ամյա երաժիշտը հիվանդանոց է տեղափոխվել ուղեղի կաթվածով, որը կոմայի պատճառ է դարձել: Երգչի ներկայացուցիչը հայտարարել է, որ Դավիդյանի մահվան պատճառ կարող էին դառնալ ընդհանուր անզգայացմամբ կույրաղիքի վիրահատության հետեւանքները: Մոսկվայի դատախազությունն արդեն զբաղվում է Անդրեյ Դավիդյանի մահվան հանգամանքները պարզելով: «Մեծ արտիստ», «տաղանդավոր երաժիշտ», «կատարյալ մարդ». այսպես են բնորոշում Դավիդյանին նրա գործընկերները: Դեկտեմբերի 7-ին կայանալու էր երգչի հոբելյանական համերգը:
Նոյեմբերի 14-ին դոլարի փոխարժեքն աճել է, եվրոյինը՝ նվազել: Արդյունքում դոլարի փոխարժեքը կազմել է 478 դրամ, եվրոյինը՝ 514, ռուբլունը՝ 7 դրամ 23 լումա, ֆունտինը՝ 597 դրամ։
Նոյեմբերի 15-ին հանրապետության տարածքում սպասվում է առանց տեղումների եղանակ: Օդի ջերմաստիճանն աստիճանաբար կնվազի: Երեւանում նույնպես վաղը տեղումներ չեն սպասվում:
