Սերժ Սարգսյանը հանդես է եկել Երեւանի եւ Բաքվի միջեւ «թեժ գիծ» ստեղծելու օգտին: «Ռուսաստանն այսօր» միջազգային լրատվական գործակալության տնօրեն Դմիտրի Կիսելյովին տված հարցազրույցում Հայաստանի նախագահն ասել է, որ դա թույլ կտա օպերատիվ արձագանքել Լեռնային Ղարաբաղում շփման գծում իրադարձություններին: Սերժ Սարգսյանը «պատրաստ է հսկողություն սահմանել եւ ճշգրիտ ասել, մերոնք կրակում են, թե՞ չեն կրակում, իհարկե՝ նույնպիսի վերաբերմունք սպասելով ադրբեջանական ղեկավարության կողմից»: Նա նշել է, որ նման փորձ եղել է դեռեւս 1990-ականների սկզբին, երբ Հայաստանի պաշտպանության նախարար էր եւ ուղիղ կապ ուներ Ադրբեջանի իր պաշտոնակցի հետ:
Արցախի հերոս, կրտսեր սերժանտ Ռոբերտ Աբաջյանը նոյեմբերի 16-ին կդառնար 20 տարեկան։ Որքան հույսեր եւ ծրագրեր մնացին չիրագործված... Մայրը՝ Աննա Աբաջյանն ասում է՝ որդին շատ էր սիրում իր ծննդյան օրը: Երիտասարդի քեռին էլ պատմել է, որ Ռոբերտը կյանքով լի էր: Ասում է՝ նրան կարելի է «դարի ուրախություն» անվանել: Հիշեցնենք, որ Ռոբերտ Աբաջյանը զոհվել է ապրիլի 2-ին, Արցախի դեմ Ադրբեջանի սանձազերծած ռազմական գործողությունների ժամանակ, Մարտակերտի ուղղությամբ տեղակայված դիրքը պաշտպանելիս։
Խորհրդարանի 6 խմբակցություններից 4-ը կողմ են զինծառայողների ապահովագրական ֆոնդին հազար դրամ գանձելու մասին օրինագծին։ Ազգային ժողովում այսօր օրենքի նախագծին կողմ են արտահայտվել ՀՀԿ-ն, ՕԵԿ-ը, ՀՅԴ-ն եւ ԲՀԿ-ն: Իսկ ՀԱԿ-ն ու «Ժառանգություն»-ը կողմ են զինվորականներին օգնելուն, բայց դեմ են չունեւորներից գումար գանձելուն: Օրինագիծը ներկայացրած պաշտպանության նախարարը եզրափակիչ ելույթը սկսել է քննարկումների առիթով գոհունակություն հայտնելով, նույնիսկ՝ քննադատական հայտարարությունների: Ասում է՝ այս օրերի ընթացքում հասկացել է, որ այս հարցով անտարբեր չեն: Վիգեն Սարգսյանին, սակայն, անհանգստացրել է այն հայտարարությունների առատությունը, որով ցեխ էին շպրտում բարձրաստիճան զինվորականների վրա, քանի որ ցեխի մեջ թաթախված գեներալների կողքին նաեւ ազնիվ զինվորականներ կան, եւ հարկավոր է զգույշ լինել:
Վիգեն Սարգսյանի խոսքով՝ հավաքագրվող գումարները, իհարկե, կարելի էր նաեւ բյուջեից գտնել, բայց ինքը նպատակ է ունեցել տարանջատել բյուջեից, որպեսզի սա ժողովրդի հարգանքի տուրքը լինի հայրենիքի համար զոհված կամ այն պաշտպանելիս հաշմանդամ դարձած մարդկանց: Նախարարը բոլորին կոչ է արել «կողմ» քվեարկել օրինագծին, նույնիսկ նրանց, ովքեր սկզբունքորեն դեմ են դրան: Օրինագիծը քվեարկության կդրվի Ազգային ժողովի վաղվա նիստում:
Այսօր Ազգային ժողովում էին նաեւ կառավարության անդամները: Հարցուպատասխանի ընթացքում ամենաուշագրավը, թերեւս, Դավիթ Հարությունյան-Լեւոն Զուրաբյան «մենամարտն» էր: Զուրաբյանին հետաքրքրել է, թե ինչու են իշխանությունները պետական փողերով սեփական քարոզչությունն անում: Հայտարարության պատճառը մամուլի հրապարակումներն են, որոնց համաձայն՝ Կառավարության աշխատակազմում գործող տեղեկությունների եւ վերլուծությունների կենտրոնը տարեկան 191 մլն դրամ է ստանում, որից սոցցանցերում կառավարության մասին յուրաքանչյուր դրական հրապարակման համար 15 հազար դրամ է վճարում: Հարությունյանը, ըստ էության, չի հերքել, որ ՊՈԱԿ-ը գումար է վճարում նման հրապարակումների համար, բայց ասել է, որ իր աշխատակազմի բնական եւ պարտադիր գործառույթն է՝ հանրությանը տեղեկացնել կառավարության գործունեության մասին: Ամեն դեպքում, Դավիթ Հարությունյանը չի զլացել նաեւ խայթել Լեւոն Զուրաբյանին եւ ՀԱԿ-ին:
Այս օրերին ամենաքննարկվող թեմաներից մեկը Կառավարության նորանշանակ անդամների՝ իշխող Հանրապետական կուսակցությանն անդամագրվելն է: Վարչապետ Կարեն Կարապետյանը շարունակում է պահել ինտրիգը. երբ անդամագրվի ՀՀԿ-ին, հանրությունն այդ մասին կիմանա: Չնայած դրան՝ մամուլում տեղեկություններ կան, որ վարչապետը դառնալու է կուսակցության փոխնախագահը: Ինչ վերաբերում է նախարարներին. առաջինը Վիգեն Սարգսյանը հրապարակավ հայտարարեց, որ հաստատապես Հանրապետականի անդամ է դառնալու: Գյուղնախարար Իգնատի Առաքելյանը դեռեւս չի կողմնորոշվել, այդ մասին որոշում չի կայացրել նաեւ տրանսպորտի նախարար Վահան Մարտիրոսյանը: Նախարարները, թերեւս, սպասում են նոյեմբերի 26-ին նախանշված ՀՀԿ համագումարին, որի ժամանակ, մամուլի հրապարակումների համաձայն, փոփոխություններ են սպասվում:
Հուլիսին ոստիկանության Երեւանի ՊՊԾ գնդի գրավման օրը վիրավորված եւ 2 շաբաթ անց մահացած ոստիկանության ավագ ենթասպա Գագիկ Մկրտչյանի գործով մեղադրանք է առաջադրվել Արմեն Բիլյանին: Նա իրեն առաջադրված մեղադրանքը չի ընդունում, փաստաբանն էլ դիմել է նախաքննական մարմնին, որպեսզի ստանա գործի նյութերը՝ հասկանալու համար, թե ինչպես է հիմնավորվել, որ հենց Բիլյանն է կրակել Մկրտչյանի վրա: Հիշեցնենք, որ երեկ էլ մյուս ոստիկանի՝ Յուրի Տեփանոսյանի սպանության համար մեղադրանք էր առաջադրվել Սմբատ Բարսեղյանին: Միաժամանակ, նախաքննական մարմինը դեռ գաղտնի է պահում, թե գնդի գրավման օրը ով է սպանել Արթուր Վանոյանին:
Գյումրիի «Եռանկյունի» ռեստորանում այսօր վիճաբանություն է տեղի ունեցել, որից հետո կրակոցներ են հնչել: Մեր տեղեկություններով՝ վիճաբանությունը ծագել է ռեստորանի տիրոջ՝ «Դարբին Գագիկի» որդու եւ Վահրամաբերդում բնակվող ոմն Վահրամի միջեւ: Ըստ շրջանառվող լուրերի՝ Վահրամը մոտ մեկ շաբաթ առաջ ընկերների հետ «Եռանկյունի» ռետորանում է եղել, վիճաբանել են աշխատակիցների հետ, որին միջամտել է ռեստորանի տիրոջ որդին։ Նրանց միջեւ ծեծկռտուք է սկսվել: Ըստ երեւույթին՝ այսօր տեղի ունեցածը նախորդի շարունակությունն է եղել: Իրավապահ մարմինները դեռեւս պաշտոնապես ոչինչ չեն հայտնում դեպքի մասին:
Մահվան ելքով վթար Վայոց ձորում: Վաղ առավոտյան Մալիշկա գյուղի սկզբնամասում «ՎԱԶ-2106» մակնիշի ավտոմեքենան դուրս է եկել ավտոճանապարհի երթեւեկելի հատվածից, բախվել հողաթմբին եւ շրջվել: Վարորդը՝ 28-ամյա Վաղինակ Նազարյանը, տեղում մահացել է: Մեքենան հաշվառված է նրա համագյուղացու՝ Կարեն Շտոյանի անունով:
Նոյեմբերի 16-ին դոլարը շարունակել է թանկանալ, իսկ եվրոն կտրուկ էժանացել է: Արդյունքում դոլարի փոխարժեքը կազմել է 479 դրամ, եվրոյինը՝ 513, ռուբլունը՝ 7 դրամ 33 լումա, ֆունտինը՝ 596 դրամ։
Նոյեմբերի 17-ին հանրապետության տարածքում ժամանակ առ ժամանակ տեղումներ են սպասվում: Օդի ջերմաստիճանն աստիճանաբար կնվազի 7-9 աստիճանով: Երեւանում նույնպես վաղը ժամանակ առ ժամանակ տեղումներ կլինեն: