Ժամանակակից աշխարհում կարծում եմ բոլոր պետությունները փոխկապակցված են, իսկ փոքր տնտեսություն ունեցող երկրներն ավելի շատ են կախված արտաքին ազդակներից: Այդ մասին ասել է Հայաստանի նախագահ Սերժ Սարգսյանը «Սքայ Նյուզ Արաբիա» հեռուստաընկերությանը տված հարցազրույցում։
Հարցին, թե Եվրոպայում տեղի ունեցող ներքին իրադարձությունները, Միացյալ Նահանգներում Թրամփի հաղթանակը ինչպե՞ս կարող են ազդեցություն ունենալ Հայաստանի Հանրապետության ներքաղաքական կյանքի վրա, Սարգսյանը պատասխանել է. «Այս առումով մենք որեւէ մտավախություն չունենք, որովհետեւ Միացյալ Նահանգների հետ մենք ունենք շատ լավ բարեկամական հարաբերություններ, եւ անցած 25 տարիների ընթացքում մեր հարաբերությունները զարգացել են վերընթաց ճանապարհով: Մենք հավասարաչափ լավ հարաբերություններ ունենք ինչպես Դեմոկրատական, այնպես էլ Հանրապետական կուսակցությունների հետ: Գիտեք, որ Միացյալ Նահանգներում բազմաթիվ հայեր են ապրում, ովքեր հասել են մեծ հաջողությունների, եւ Միացյալ Նահանգների կոնգրեսականներն ունեն հայ բարեկամներ, հայերն ունեն կոնգրեսական բարեկամներ՝ մարդիկ, ովքեր մաս են կազմում Միացյալ Նահանգների եւ՛ Սենատում, եւ՛ Ներկայացուցիչների պալատում ձեւավորված բարեկամական խմբերի, որոնց հետ մեր հարաբերությունները մշտապես լավ են»:
Սարգսյանը նշել է, թե որեւէ էական փոփոխություն հայ-ամերիկյան հարաբերություններում չի կանխագուշակում Միացյալ Նահանգների նախագահական ընտրություններից հետո: «Վստահ եմ, որ մեր հարաբերությունները լավ են զարգանալու: Մեր ներքաղաքական իրավիճակի վրա ավելի մեծ ազդեցություն ունեն այն իրադարձությունները, որ տեղի են ունենում Մերձավոր Արեւելքում, որովհետեւ Մերձավոր Արեւելքում տեղի ունեցող իրադարձություններին անմիջապես մասնակից են մեր հայրենակիցները, ովքեր ապրում են այստեղ, եւ այս առումով, իհարկե, այս իրադարձությունները շատ ավելի զգայուն են մեզ համար»,- ասել է նա: