Հայաստանն այսօր փաստորեն որեւէ հարաբերություններ չունի Անկարայի հետ։ Այդ մասին ասել է Հայաստանի նախագահ Սերժ Սարգսյանը «Սքայ Նյուզ Արաբիա» հեռուստաընկերությանը տված հարցազրույցում։
Հարցին, թե ներկա դրությամբ, ինչպե՞ս կբնութագրի Երեւանի եւ Անկարայի հարաբերությունները, Սերժ Սարգսյանը պատասխանել է. «Կբնութագրեի որպես հարաբերությունների բացակայություն: Մենք այսօր փաստորեն որեւէ հարաբերություններ չունենք Անկարայի հետ, որովհետեւ, ինչպես Դուք իրավացիորեն նշեցիք, մենք մի քանի տարի առաջ հանդես եկանք նախաձեռնությամբ՝ Թուրքիայի հետ հաստատել հարաբերություններ առանց որեւէ նախապայմանի: Տեւական բանակցություններից հետո մենք Շվեյցարիայում փաստաթուղթ ստորագրեցինք, ընդ որում փաստաթղթի ստորագրմանը ներկա էին ՄԱԿ-ի Անվտանգության խորհրդի մշտական անդամ երկրների արտգործնախարարները՝ գրեթե ամբողջական կազմով: Նրանք վկա էին այդ փաստաթղթի ստորագրմանը»,- ասել է Սարգսյանը:
Նրա խոսքով, այդ փաստաթուղթը ենթադրում էր վավերացում ազգային խորհրդարանների կողմից: «Սակայն, ցավոք սրտի, Թուրքիայի ղեկավարությունը հրաժարվեց այդ փաստաթուղթը վավերացնել: Մենք շատ ջանք էինք ներդրել, որպեսզի այդ փաստաթուղթը իրականություն դառնա: Ես մեկ շաբաթվա ընթացքում շրջել եմ գրեթե ամբողջ աշխարհով մեկ, հանդիպել հայկական սփյուռքի ներկայացուցիչների հետ՝ Լիբանանից մինչեւ Լոս Անջելես, մինչեւ Նյու Յորք, մինչեւ Դոնի Ռոստով, բայց այնուհանդերձ թուրքական ղեկավարության՝ չգիտեմ ինչ-ինչ պատճառով բռնած դիրքորոշումը բերեց նրան, որ այդ փաստաթուղթը մինչեւ հիմա այնտեղ որոշակի դարակներում է: Մենք այլեւս քայլ անելու որեւէ առիթ կամ հնարավորություն չունենք, որովհետեւ գնդակը գտնվում է թուրքերի դաշտում, եւ նրանք են, կարծում եմ, որ հիմա պետք է քայլ կատարեն»,- ասել է նախագահը: