Այս պահի դրությամբ դպրոցներում դասերը դադարեցնելու որեւէ հիմք չկա: Այս մասին NEWS.am-ին ասաց Կրթության եւ գիտության նախարարության հանրակրթության վարչության պետ Նարինե Հովհաննիսյանը` անդրադառնալով դպրոցականների շրջանում տարածված սուր շնչառական վարակներին եւ գրիպին:
«Առողջապահության նախարարությունն իրականացնում է «կանխարգելիչ ֆիլտր»: Թվերը դեռ մենք չենք ստացել, սակայն գիտենք, որ բավականին շատ երեխաներ բացակայում են»,- ասաց Նարինե Հովհաննիսյանը:
Նշենք, որ ըստ Առողջապահության նախարարության տարածած հաղորդագրության` միայն նոյեմբերի 21-ին հիվանդ վիճակում դպրոց կամ մանկապարտեզ հաճախած մոտ 1800 երեխա տուն է ուղարկվել, նրանց տվյալները փոխանցվել է պոլիկլինիկական կազմակերպություններին՝ բժշկական հսկողություն սահմանելու համար:
Հիշեցնենք, որ հանրապետությունում, ինչպես նաև եվրոպական տարածաշրջանի երկրներում, այդ թվում՝ Վրաստանում, Ռուսաստանի Դաշնությունում, Ուկրաինայում վերջին մեկ ամսվա ընթացքում շրջանառում են գրիպի Ա տեսակի H3 ենթատեսակը և այլ շնչառական վարակների հարուցիչներ:
Այս օրերին հիվանդանոցներում ազատ տեղեր չկան: Խոսակցություններ կան, որ այդ պատճառով նույնիսկ հնարավոր է պլանային վիրահատությունները հետաձգվեն:
