Համբուրգում Լեռնային Ղարաբաղի հարցով հանդիպման ձեւաչափը դեռեւս պարզ չէ։ Անդրադառնալով ԵԱՀԿ արտգործնախարարների խորհրդի շրջանակում Հայաստանի եւ Ադրբեջանի արտաքին քաղաքական գերատեսչությունների ղեկավարների հնարավոր հանդիպմանը՝ այս մասին հայտարարել է փոխարտգործնախարար Շավարշ Քոչարյանը: Ինչ վերաբերում է հիմնախնդրի բանակցություններին ընդհանրապես, Քոչարյանն այսօր առաջընթաց չի տեսնում:
Խոսելով սպառազինության գնման շուրջ ադրբեջանական կողմի բանակցությունների մասին՝ Շավարշ Քոչարյանը կարծիք է հայտնել, որ խնդիրը միայն զենքի տեսակի եւ քանակի մեջ չէ: Պետք է նաեւ հաշվի առնել այլ գործոններ, որոնցից ամենակարեւորը, բնականաբար, մարդկային ոգին է, գիտակցությունը, որ ժողովուրդը պայքարում է իր հողի համար: Իսկ պետության համար լավագույն անվտանգության երաշխիքը սեփական ուժերի վրա հույս դնելն է։ Բայց չի կարելի անտեսել նաեւ ժամանակակից սպառազինությունները: Հայկական կողմն իրավիճակը հավասարակշռելու կարիք ուներ: Հիմա «Սմերչեր», «Սոլնցեպյոկներ», «Իսկանդերներ» ունենք, բայց վատն այն է, որ դա բերում է սպառազինությունների նոր մրցավազքի: Իսկ սրանից երկու ելք կա:
Արցախի մարտական դիրքերից մեկում ծառայակից Ա.Ներսեսյանի հետ վիճաբանության ընթացքում գլխի շրջանում հրազենային վիրավորում ստացած Ազնավուր Բալեյանը Գեղարքունիքի մարզի Ծովազարդ գյուղից է: Այս պահին զինծառայողը Ստեփանակերտի զինվորական հոսպիտալում է, կայուն ծանր վիճակում: Ազնավուր Բալեյանը 6 ամսից զորացրվելու է: Նախնական տվյալներով՝ վեճն առաջացել է դիտակետում քնելու հարցի պատճառով. փոխադարձ հայհոյանքներ են հնչել, ապա Ա.Ներսեսյանը կրակոցներ է արձակել Բալեյանի ուղղությամբ: Ներսեսյանը ձերբակալվել է:
Նոր զարգացումներ ծննդկան Մերի Մարգարյանի եւ նորածնի մահվան գործով: Հնարավոր է` մոտ ապագայում նոր մեղադրանքներ առաջադրվեն «Շենգավիթ» բժշկական կենտրոնի այն բժիշկներին, որոնց մասով լրացուցիչ հանձնաժողովային դատաբժշկական փորձաքննություն էր նշանակվել: Պարզվել է, որ հուլիսի 26-ին եւ 27-ին ծննդկանի հետ առնչված բժիշկների գործողություններում թերացումներ եւ բացթողումներ են արձանագրվել: Խոսքը ծննդատան վարիչ Աշոտ Սիրունյանի, բուժգծով տնօրենի տեղակալ Դավիթ Մխիթարյանի, հուլիսի 26-ին հերթապահած բժիշկ Տիգրան Սարգսյանի ու ռեանիմատոլոգ Արամ Գրիգորյանի մասին է: Հիշեցնենք, որ Մերի Մարգարյանի գործից մի մասն արդեն առանձնացվել եւ ուղարկվել է դատարան, որով երկու մեղադրյալ կա` Շուշանիկ Բախշյանն ու Անի Բաբելյանը:
Երկաթուղային կայարանի երկաթգծերի մոտ գտնվող վագոն տնակում, որտեղ գիշերում են տարածքի անօթեւանները, տղամարդու դի է հայտնաբերվել՝ դեմքին եւ գլխին վնասվածքներով: Իրավապահները պարզել են, որ նա Էրեբունի վարչական շրջանի հասցեներից մեկում հաշվառված 56-ամյա Գագիկ Ներսիսյանն է, որը, սակայն, մշտական բնակության վայր չի ունեցել: Պարզվել է, որ դիակի հայտնաբերումից երկու օր առաջ այդ վագոնում վիճաբանություն եւ ծեծկռտուք է եղել: Ներսիսյանը դիմել է իր ծանոթ ոմն Արայի եւ հայտնել, որ վագոնում գիշերելու համար այսինչ մարդն իրենից փող է ուզում: Արան էլ եկել ու ծեծել է գիշերելու համար Գագիկից փող պահանջած տղամարդուն, հետո պարզել է, որ Ներսիսյանը ստել է: Գագիկ Ներսիսյանը մահացել է գլխուղեղի վնասվածքից: Քրեական գործ է հարուցվել: Արա Սահակյանը ձերբակալված է: Նա նախկինում տարբեր հանցանքների համար մի քանի անգամ դատապարտված է եղել:
Դպրոցականների շրջանում սուր շնչառական վարակներ եւ գրիպ է տարածված, բայց դասերը դադարեցնելու որեւէ հիմք Կրթության նախարարությունն առայժմ չունի: Առողջապահության նախարարության տվյալների համաձայն՝ միայն նոյեմբերի 21-ին հիվանդ վիճակում դպրոց կամ մանկապարտեզ հաճախած շուրջ 1800 երեխայի տուն են ուղարկել: Հիշեցնենք, որ Հայաստանում, ինչպես նաեւ եվրոպական տարածաշրջանի մի շարք երկրներում վերջին մեկ ամսվա ընթացքում գրիպի A տեսակի H3 ենթատեսակը եւ այլ շնչառական վարակների հարուցիչներ են շրջանառվում: Այս օրերին հիվանդանոցներում ազատ տեղեր չկան: Խոսակցություններ կան, որ այդ պատճառով նույնիսկ հնարավոր է պլանային վիրահատություններ հետաձգվեն:
Նոյեմբերի 23-ին դոլարը պահպանել է կայուն դիրքերը: Արդյունքում դոլարի փոխարժեքը կազմել է 479 դրամ, եվրոյինը՝ 508, ռուբլունը՝ 7 դրամ 46 լումա, ֆունտինը՝ 593 դրամ։
Նոյեմբերի 24-ին հանրապետությունում սպասվում է առանց տեղումների եղանակ: Լոռիում, Տավուշում, Սյունիքում եւ Արցախում օդի ջերմաստիճանն աստիճանաբար 3-4 աստիճանով կբարձրանա: Երեւանում նույնպես վաղը տեղումներ չեն սպասվում:
