Ես այսօր դիմում եմ ներկայացրել ՀՀԿ-ին անդամագրվելու համար: Այս մասին այսօր՝ նոյեմբերի 24-ին, կառավարության նիստի մեկնարկին հայտարարել է ՀՀ վարչապետ Կարեն Կարապետյանը՝ ներկայացնելով իր այդ քայլի մի քանի հիմնավորումներ:
Նրա խոսքով՝ դա պայմանավորված է առաջին հերթին այն հանգամանքով, որ վարչապետի պաշտոնին իրեն հրավիրել է ՀՀ նախագահը, ով ՀՀԿ ղեկավարն է, իսկ ցանկացած կառավարություն պետք է քաղաքական հենարան ունենա:
«Վարչապետի պաշտոնին հրավիրել է ՀՀԿ նախագահ Սերժ Սարգսյանը: Յուրաքանչյուր կառավարություն պետք է ունենա քաղաքական հենարան, իսկ այս կառավարությունը ՀՀԿ-ի կառավարությունն է: Եթե նույնիսկ հաշվի չառնենք այս կետերը, ոմանց մոտ կարող է լինել տեսական հարցադրում, ինչու չենք հիմնադրել մեկ այլ կուսակցություն: Դա արդարացված չէր լինի: Ուեննալով Արցախի հիմնահարց եւ մեր երկրի անվտանգության առջեւ կանգնած սպառնալիքներ, մենք պետք է խուսափենք հնարավոր բոլոր ապակայունացնող գործընթացներից եւ զարգացումներից», – նշել է Կարեն Կարապետյանը:
Նա համոզմունք է հայտնել, որ քաղաքական փոփոխությունների քաղաքական հենարան կարող է լինել հենց ՀՀԿ-ն. «Նման հենարան կարող է դառնալ ՀՀԿ–ն նաեւ այն պատճառով, որ կուսակցության պահպանողական գաղափարախոսությունն ինձ հոգեհարազատ է եւ այնտեղ ինձ համար բազմաթիվ ընդունելի մարդիկ կան»:
«Չափազանց կարեւոր է, որ ինձ վարչապետ հրավիրելու պահին եւ դրանից հետո իմ առջեւ դրված հիմնական խնդիրը եղել է հետեւյալը՝ անհրաժեշտ է շատ բան փոխել տնտեսական, սոցիալական կյանքում, առավել եւս պետական կառավարման համակարգում, ինչը նշանակում է, որ փոփոխությունները պետք է սկսենք մեզնից։ Այդ հարցը ՀՀԿ-ում շատ հստակ է դրված, իսկ ինքնաքննադատությունը հաճախ ավելի սուր է, քան պատկերացնում են դրսից»,– ասել է վարչապետը։
Հիշեցնենք, ՀՀԿ-ի համագումարը նախատեսված է այս շաբաթ` նոյեմբերի 26-ին: Մամուլի տեղեկությունների համաձայն ՀՀԿ-ական են դառնալու բոլոր նախարարները, իսկ Կարեն Կարապետյանն ընտրվելու է կուսակցության փոխնախագահ: