Մոսկվայի ոստիկանության օպերատիվ աշխատակիցները պարզել են նոյեմբերի 24-ի գիշերը մայրաքաղաքի Յասնեւո շրջանում գնդակահարված տղամարդու անձը: Այս մասին Lenta-ին հայտնել է իրավապահ մարմիններում աղբյուրը:
Սպանվածը Հայաստանի քաղաքացի Գեւորգ Գեւորգյանն է, որը Մոսկվայի շրջանում շինարարական բիզնեսով էր զբաղվում:
Աղբյուրի խոսքով՝ 2006 թվականի արտադրության BMW մեքենան, որի կողքին հայտնաբերվել է Գեւորգյանի դին, նա 2014 թվականին ձեռք էր բերել վարկով:
«Մոսկովսկի Կոմսոմոլեց»-ը հայտնում է, որ գործարարը արտասահմանյան մակնիշի մեքենան ձեւակերպել էր հեռավոր ազգականի անունով, որը նույնպես ծագումով Հայաստանից է, բայց վաղուց Ռուսաստանի քաղաքացիություն ունի:
Ավելի վաղ հայտնի է դարձել, որ Մոսկվայի հարավ-արեւմուտքում իրականացված տղամարդու սպանությունը նման է պատվերով սպանության: Ինչպես տեղեկացրել ենք, սպանվածի հրազենային վիրավորումով դիակը հայտնաբերվել է Լիտովսկի պուրակի մոտ:
Իրավապահ մարմիններից հայտնել են, որ անհայտ անձը Կալաշնիկովի կարճափող ինքնաձիգով գնդակահարել է տղամարդուն, որից հետո փախուստի է դիմել՝ զենքը թողնելով սպանության վայրում:
Քննչական կոմիտեից այս տեղեկությունը հաստատել են՝ հստակեցնելով, որ ինքնաձիգը գտել են դիակից 300 մետր հեռավորությամբ:
Սպանվածի կողքին կանգնած է եղել մեքենա, որի մեջ, նախնական տեղեկություններով, գնդակի երեք հետք է հայտնաբերվել:
