Եթե եկող խաղերում Մոուրինյոն Մխիթարյանին չընդգրկի թիմի կազմում, ապա անգլիացի երկրպագուները կսկսեն կասկածել մարզչի ադեկվատության մեջ: Այս մասին NEWS.am-ի թղթակից Վերա Մարտիրոսյանի հետ զրույցում նշել է www.sportfakt.ru կայքի գլխավոր խմբագիր, անգլիական ֆուտբոլի մասնագետ, Արթուր Պետրոսյանը, ով ընդգրկված է ռուսական ժյուրիի կազմում՝ The Guardian հեղինակավոր կայքի տարվա լավագույն ֆուտբոլիստի քվեարկության մեջ:
«Մանչեսթեր Յունայթեդ» – «Ֆեյնորդ» խաղում Մխիթարյանը չդարձավ գոլի ու գոլային փոխանցման հեղինակ, բայց իմ կարծիքով նրան վստահորեն կարելի է ճանաչել խաղի լավագույն ֆուտբոլիստ: Առաջին րոպեներից երեւում էր, որ նրա աչքերը փայլում էին: Դա հասկանալի էր, քանի որ եթե երկրպագուների ու թիմակիցների համար դա Եվրոպայի լիգայի հերթական հանդիպումն էր, նրա համար դա կյանքի խաղ էր: Դա հնարավորություն էր ցույց տալու, թե ինչ լավ ֆուտբոլիստի է Մոուրինյոն քանի ամիս նստեցրել պահեստայինների նստարանին: Մխիթարյանն ամենուր էր: Նա սկսեց խաղը «տասը համարի» դիրքում, հետո խաղում էր ձախից, վերջում տեղափոխվեց աջ եզր:
Բոլոր դիրքերում նրա դերը թիմի գործողություններում զգալի էր: Իր ճկունությամբ անընդհատ ստիպում էր Ռունիին ու Իբրահիմովիչին ավելի ակտիվ գործել, միշտ բացվում էր: Թվում էր՝ նա շատ արագ է շարժվում ու շատ արագ է մտաշում իր որոշ թիմակիցների համեմատ: Վիճակագրությունը ամեն բան ասում է: Հենրիխը վեց հարված է կատարել՝ դա ավելի շատ է, քան «Ֆեյնորդի» կողմից կատարվածները: Երեք գոլային պահ ստեղծեց: Նրա փոխանցումների ճշտությունը 85 տոկոս էր, ինչը հարձակողական քառյակի ֆուտբոլիստի համար լավ ցուցանիշ է: Նա անգամ հաղթեց օդային մենամարտերից մեծ մասում:
Պատահական չէր, որ ֆուտբոլագետ անգլիացիները նրան ծափողջյուններով ճանապարհեցին: Սակայն այս ամենը դեռ չի նշանակում, որ կիրակի օրը Մոուրինյոն նրան դաշտ դուրս կբերի «Վեսթ Հեմի» հետ խաղում: Վերջինս Անգլիայի ֆիզիկապես ամենաուժեղ պատրաստված թիմերից է: Հնարավոր է պորտուգալացին համարի, որ Մխիթարյանը պատրաստ չէ այդպիսի ֆուտբոլի համար: Բայց գոնե պահեստայինների թվում այդ խաղում նա պետք է լինի, իսկ մյուս գավաթային խաղում նույն «Վեսթ Հեմի» հետ հիմնական կազմում: Հակառակ դեպքում Մոուրինյոն կկորցնի «Յունայթեդի» երկրպագուների աջակցությունը, որոնք արդեն սկսում են կասկածել նրա ադեկվատության վրա»,- Ասաց Պետրոսյանը:
Վերա Մատիրոսյան
