Երեւանի Շենգավիթ համայնքում 37-ամյա կնոջը խանդի հողի վրա դանակահարելով սպանելու մեջ կասկածվող տղամարդը կալանավորվել է:

NEWS.am-ին Քննչական կոմիտեից հայտնեցին, որ տղամարդուն մեղադրանք է առաջադրվել Քրեական օրենսգրքի 112-րդ հոդվածի 2-րդ մասով:

Ավելի վաղ Քննչական կոմիտեն հաղորդել էր, որ նոյեմբերի 25-ին՝ ժամը 14.20-ին, շտապօգնության թիվ 6 ենթակայանից հաղորդում է ստացվել, որ կանչով մեկնել են  Շենգավիթ վարչական շրջանի տներից մեկը, որտեղ հայտնաբերել են 1979թ. ծնված Ա.Մաղաքյանի դիակը՝ աջ ազդրի կտրած-ծակած վերքով: Անմիջապես դեպքի վայր է մեկնել քննչական-օպերատիվ խումբը եւ ձեռնարկել անհրաժեշտ անհետաձգելի գործողություններ՝ կնոջ մարմնական վնասվածքն ստանալու հանգամանքները պարզելու համար։

Նախնական տվյալներով՝ տուժողն իր ժամանակավոր բնակության վայրում վիճաբանել է նույն տանը ժամանակավորապես բնակվող տղամարդու հետ, որի ժամանակ վերջինս սուր ծակող-կտրող գործիքով հարվածել է կնոջ աջ ազդրի վերին երրորդի առաջային մակերեսին` Ա.Մաղաքյանի առողջությանը պատճառելով աջ ազդրի վերին երրորդի առաջային մակերեսի երկայնակի ծակած-կտրած վերքի ձեւով, կյանքին վտանգ սպառնացող ծանր վնաս: Ա.Մաղաքյանն ստացած վնասվածքի հետեւանքով մահացել է:

Կատարվել է դեպքի վայրի զննություն, որի ժամանակ հայտնաբերվել եւ վերցվել են բազմաթիվ արնանման նյութի հետքեր, ձեռքի գծանախշի հետք, արնանման նյութի հետքերով խոհանոցային սուր դանակ, լվացած տղամարդու մեկ զույգ կոշիկ, արնանման նյութի հետքերով վարագույր, սեղանի ծածկոց եւ տղամարդու հագուստ:

Քրեական գործով էական նշանակություն ունեցող հանգամանքները պարզելու համար նշանակվել են դիակի դատաբժշկական, դատակենսաբանական, դատամատնադրոշմային փորձաքննություններ: Հարցաքննվել են շուրջ երկու տասնյակ անձինք:

Shamshyan.com-ի փոխանցմամբ, այս գործով մեղադրյալը Արտաշատի բնակիչ 34-ամյա Արամ Մ.-ն է: նա ընթերակաների մասնակցությամբ քննչական փորձարարության ժամանակ ներկայացրել էր, թե ինչպես և ինչ պայմաններում է վիճաբանությունը տեղի ունեցել իր և մահացածի միջև, որի ժամանակ ինքը դանակով մեկ անգամ հարվածել է մահացած ոտքին։ Այնուհետև տեսնելով, որ արյուն է գալիս, ինչ-որ կապոց է դրել և հեռացել։ Նա հայտնել էր նաև, որ պատճառը եղել է խանդը, քանի որ մահացածը, ում հետ ինքը 3 տարուց ավելի մտերմական կապի մեջ էր եղել, «իրեն դավադիտ էր արել»՝ հայտնելով, որ բացի իրենից, ինքը ոչ մեկինը չի լինելու։

Մինչ տունը լինելը, նրանք ինչ-որ ժամանցի վայրում գինովցել էին, որից հետո եկել էին տուն, որտեղ բնակվում էին վարձակալական հիմունքներով։ Կասկածյալը ներկայացրել էր նաև այն տեղը, որտեղից ինքը վերցրել էր դանակը և հարվածել Ա. Մաղաքյանին։