Երկար սպասված եւ օրեր շարունակ քննարկումների առիթ դարձած Հանրապետական կուսակցության համագումարը կայացավ: Միաձայն ՀՀԿ նախագահ վերընտրվեց Սերժ Սարգսյանը, կուսակցության Գործադիր մարմնի 21 հոգանոց կազմում ընդգրկվեցին նաեւ նորաթուխ հանրապետականներ Կարեն Կարապետյանն ու Վիգեն Սարգսյանը: Սերժ Սարգսյանի թեկնածությունն առաջարկեց Երեւանի քաղաքապետ Տարոն Մարգարյանը, իսկ Արմեն Աշոտյանը շտապեց բաց քվեարկություն կազմակերպել:
Մինչ այդ ունեցած հաշվետու ելույթում Սերժ Սարգսյանը նաեւ վերջակետ դրեց կարճաժամկետ կառավարության կազմի մասին խոսակցություններին. 2017 թվականի ընտրություններում հաղթանակի դեպքում կառավարությունը կրկին կգլխավորի գործող վարչապետը: Սերժ Սարգսյանը խոսեց կուսակցության ներքին խնդիրների մասին: Ասաց՝ խնդիր կա կուսակցականների հանրային խոսքի առումով: Չնայած վերջին տարիներին հանրապետականների հանրային խոսքի ոճն ու բովանդակությունը փոխվել է, բայց լուրջ տնային աշխատանքի կարիք կա: Հանրապետության նախագահը կարեւորեց գալիք երկու-երեք տարիները՝ Սահմանադրության անցումային դրույթներն արդյունավետորեն կյանքի կոչելու տեսանկյունից: Հասարակական-քաղաքական կյանքում կուսակցությունների դերի բարձրացում, քաղաքական ուժերի խոշորացում է սպասվում:
Եվս մեկ շեշտադրում վերաբերում էր ղարաբաղյան հիմնախնդրին. Լեռնային Ղարաբաղի հիմնախնդիրը կարող է լուծվել միայն Արցախի ժողովրդի ազատ ինքնորոշմամբ, միայն խաղաղ բանակցությունների ճանապարհով: Ասաց, որ Ադրբեջանը շարունակում է սպառնալ ուժի ու բռնության կիրառմամբ, բայց ապրիլյան իրադարձություններն ապացուցեցին, որ Բաքվում իրատեսության հետ կապված լուրջ խնդիրներ կան:
Հավանայում հրետանու 21 համազարկով մեկնարկել է Կուբայի հեղափոխության առաջնորդ Ֆիդել Կաստրոյի հրաժեշտի արարողությունը: Դրանից հետո ամբողջ երկրում իջեցվել են պետական դրոշները։ Հանգուցյալ նախագահի դիափոշով անոթը դրվել է Հեղափոխության հրապարակի Խոսե Մարտիի անվան հուշահամալիրում։ Ֆիդել Կաստրոն մահացել է նոյեմբերի 25-ին, 90 տարեկանում։ Նրա վախճանի կապակցությամբ Կուբայում 9-օրյա սուգ է հայտարարվել:
Ազատամարտիկին ծեծելով սպանելու մեջ մեղադրվող «Ջունգլ»-ը հիվանդանոցի վերակենդանացման բաժանմունքում է հայտնվել: Նա բուժհաստատություն է տեղափոխվել կտրած-ծակած վերքերով: Դեպքի հանգամանքները պարզվում են: Նշենք, որ կիրակի առավոտյան համացանցում տեղեկություն էր տարածվել, որ «Ջունգլ» մականվամբ հայտնի Գեւորգ Սարգսյանը փողոցում ծեծել է իր կնոջը: Տղամարդու ձեռքից կնոջը փրկել է դեպքի ականատես հրապարակախոս Զառա Հովհաննիսյանը: Հիշեցնենք նաեւ, որ ազատամարտի մասնակից, 52-ամյա Վարդան Թումանյանին ծեծելով սպանելու մեջ մեղադրվող «Ջունգլին» դատարանն ազատ էր արձակել՝ մերժելով խափանման միջոցը փոխելու եւ կալանք կիրառելու վերաբերյալ դատախազի միջնորդությունը: Ազատամարտիկի հարազատները նոր փորձաքննություն են պահանջում:
«Փոքր Մհեր» ռազմական կրթահամալիրի սաները պահանջում են նորանշանակ տնօրեն Վահագն Յաղմուրյանի հրաժարականը: Այսօր վաղ առավոտից կրթահամալիրի բոլոր սաներն ի նշան բողոքի շարային երթ են կատարել հրապարակում: Տնօրենն արտահերթ ծնողական ժողով է հրավիրել՝ հասկանալու սաների դժգոհությունը: Նշենք, որ Վահագն Յաղմուրյանը կրթահամալիրի տնօրեն է նշանակվել մոտ մեկ ամիս առաջ: Սաների պնդմամբ՝ նրա նշանակումից հետո մթնոլորտը փոխվել է, այլ է նույնիսկ սպայակազմի վերաբերմունքը: Իրավիճակն ուսումնասիրելու համար կրթության նախարարի հանձնարարությամբ աշխատանքային խումբ է ստեղծվել: Մինչ այդ, փոխնախարար Մանուկ Մկրտչյանն այցելել է կրթահամալիր, որտեղ սաները մատնանշել են, որ ուսումնական աշխատանքների կազմակերպման ընթացքում առանձին դեպքերում մանկավարժական մոտեցումները չեն պահպանվում:
Արցախի մարտական դիրքերից մեկում վիճաբանության ժամանակ ծառայակցի կողմից հրազենային վիրավորում ստացած Ազնավուր Բալեյանին Երեւան են տեղափոխել: Կենտրոնական զինվորական հոսպիտալում նրան վիրահատել են: Ազնավուր Բալեյանի վիճակը շարունակում է մնալ կայուն ծանր: Ազնավուր Բալեյանը գլխի շրջանում հրազենային վնասվածք ունի: Հիշեցնենք, որ Ազնավուր Բալեյանը Գեղարքունիքի մարզի Ծովազարդ գյուղից է: Նախնական տվյալներով՝ զինծառայողների միջեւ վեճը ծագել է դիտակետում քնելու հարցի պատճառով. փոխադարձ հայհոյանքներ են հնչել, ապա Ա.Ներսեսյանը կրակել է Բալեյանի ուղղությամբ: Ներսեսյանը ձերբակալվել է:
Խանդի հողի վրա սպանել է կնոջը: Երեւանի Շենգավիթ համայնքում 37-ամյա Ալինա Մաղաքյանին սպանելու մեջ կասկածվող Արամ Մնացականյանը կալանավորվել է: Կնոջ դիակը՝ աջ ազդրի կտրած-ծակած վերքով, հայտնաբերել են նոյեմբերի 25-ին, Շենգավիթի տներից մեկում: Նախնական տվյալներով՝ տուժողն իր ժամանակավոր բնակության վայրում վիճաբանել է նույն տանը ժամանակավորապես բնակվող տղամարդու հետ, որի ժամանակ էլ վերջինը դանակով հարվածել է կնոջ աջ ազդրին: Երկուսն էլ ալկոհոլի ազդեցության տակ են եղել: Գործով մեղադրյալ 34-ամյա Մնացականյանն Արտաշատի բնակիչ է:
«Հաղթանակ» զբոսայգում երիտասարդը բռնաբարել է Երեւանին մերձակա մարզերից մեկի անչափահաս բնակչուհուն: Աղջիկը երիտասարդի հետ ծանոթացել է սոցիալական ցանցի միջոցով եւ Երեւան գալով՝ շտապել «Հաղթանակ» զբոսայգի, երիտասարդի հետ ժամադրության: Այստեղ էլ տղան բռնաբարել է նրան: Նշենք, որ անչափահաս աղջիկը Երեւան գալու եւ ժամադրության մասին գյուղում բնակվող հարազատներին չի պատմել: Վերջինները նրա անհետացման մասին ահազանգել են ոստիկանություն, իրավապահներն աղջկան որպես անհետ կորած որոնել են:
Նոյեմբերի 28-ին դոլարն ու եվրոն շարունակել են թանկանալ: Արդյունքում դոլարի փոխարժեքը կազմել է 479 դրամ, եվրոյինը՝ 510, ռուբլունը՝ 7 դրամ 39 լումա, ֆունտինը՝ 596 դրամ։
Նոյեմբերի 29-ին հանրապետությունում սպասվում է առանց տեղումների եղանակ: Օդի ջերմաստիճանն էականորեն չի փոխվի: Երեւանում նույնպես վաղը տեղումներ չեն սպասվում:
