«Ջունգլ» մականունով Գեւորգ Սարգսյանի դանակահարության դեպքից NEWS.am-ին որոշ մանրամասներ են հայտնի դարձել: Մեր տեղեկություններով դեպքը տեղի է ունեցել Աբովյան քաղաքի «Քրեյզի» գիշերային ակումբում: Տերյան փողոցում կնոջը ծեծելուց հետո Ջունգլը շտապել է նշված գիշերային ակումբ, որտեղ իրեն կորցրած բարձրացել է ակումբի բեմահարթակին եւ զվարճացել: Ապա վեճի է բռնվել ակումբում գտնվողներից մեկի հետ, որի ընթացքում էլ դանակի վնասվածք ստացել: Նրան դանակահարելու մեջ կասկածվում է Աբովյանի Չեչեն մականունով բնակիչը:
Հիշեցնենք, որ ազատամարտիկին ծեծելով սպանելու մեջ մեղադրվող «Ջունգլ»-ը նախօրեին վաղ առավոտյան տեղափոխվել է Երեւանի Սուրբ Գրիգոր Լուսավորիչ բժշկական կենտրոն: NEWS.am-ին հիվանդանոցի վերակենդանացման բաժանմունքից հայտնեցին, որ «Ջունգլ» մականվամբ հայտնի Գեւորգ Սարգսյանն իրենց մոտ է տեղափոխվել կտրած-ծակած վերքերով: Սարգսյանի վիճակը կայուն է գնահատվում: Դեպքի հանգամանքները պարզվում են: Նշենք, որ կիրակի առավոտյան համացանցում տեղեկություն էր տարածվել, որ նախօրեին Գեւորգ Սարգսյանը փողոցում ծեծել է իր կնոջը, անգամ տեսանյութ էր տարածվել:
