Երեւանի փողոցներից մեկում նոյեմբերի 26-ին կնոջը ծեծելու մեջ մեղադրվող Գեւորգ Սարգսյանի նկատմամաբ խափանման միջոց ընտրվել է: Այս մասին այսօր՝ նոյեմբերի 29-ին, NEWS.am-ը տեղեկանում է ՀՀ Քննչական կոմիտեի մամուլի ծառայությունից: Նրա նկատմամբ որպես խափանման միջոց է ընտրվել ստորագրություն՝ չհեռանալու մասին։
Դեպքի վերաբերյալ տուժած կնոջից ոստիկանությունում ստացված հաղորդման հիման վրա 2016թ. նոյեմբերի 28-ին Կենտրոն եւ Նորք-Մարաշ վարչական շրջանների դատախազությունում հարուցվել է քրեական գործ՝ ՀՀ քրեական օրենսգրքի 118-րդ հոդվածի հատկանիշներով եւ նախաքննության համար գործն ուղարկվել ՀՀ ՔԿ Երեւանի քննչական վարչության Կենտրոն եւ Նորք-Մարաշ վարչական շրջանների քննչական բաժին։ Քննիչը քրեական գործն ընդունել է վարույթ ու անմիջապես ձեռնարկել անհետաձգելի քննչական գործողություններ՝ դեպքի հանգամանքները պարզելու համար: Կինը ճանաչվել է տուժող եւ հարցաքննվել դեպքի շուրջ։ Ամուսինը հրաժարվել է ցուցմունք տալ եւ նրա նկատմամբ որպես խափանման միջոց է ընտրվել ստորագրություն՝ չհեռանալու մասին։
Քննությամբ նախնական տվյալներ են ձեռք բերվել՝ ամուսինների միջեւ վիճաբանության պատճառների մասին, որոնք հրապարակման ենթակա չեն՝ նկատի ունենալով, որ դրանք պարունակում են անձնական կյանքին վերաբերող տեղեկություններ. ՀՀ Սահմանադրության 23-րդ հոդվածի համաձայն՝ յուրաքանչյուր ոք ունի անձնական ու ընտանեկան կյանքի գաղտնիության իրավունք։ Կնոջ նկամտամբ նշանակվել է դատաբժշկական փորձաքննություն: Նախաքննությունը շարունակվում է: