Եվրահանձնաժողովը չորեքշաբթի կառաջարկի պաշտպանական հիմնադրամի (European Defence Fund) բազմամիլիարդանոց նախագիծ, հայտնում է Financial Times-ը:
Պարբերականի տեղեկություններով՝ պլանով նախատեսվում է քիբերանվտանգության, ռազմական նավաշինության մեջ ներդրումների եւ անօդաչու ավիացիայի ոլորտում հետազոտությունների համար նախատեսված միջոցների կտրուկ աճ:
Նախագծով, որը կներկայացնի Եվրահանձնաժողովի փոխնախագահ Յուրկի Կատայնեն, նաեւ նախատեսված է ռազմական սարքավորումների հետագա ստանդարտացում եւ անվտանգության ու պաշտպանական նպատակներով Եվրամիության տիեզերական ծրագրերի օգտագործում:
Պարբերականը Եվրամիության ռազմական բյուջեի աճը կապում է ԱՄՆ նորընտիր նախագահ Դոնալդ Թրամփի հայտարարությունների հետ, որը եվրոպական դաշնակիցներից պահանջում է համապատասխան ծախսերի աճ: Սակայն Եվրահանձնաժողովի նախագահ Ժան-Կլոդ Յունկերը դեռեւս սեպտեմբերի վերջին՝ մինչեւ ԱՄՆ նախագահի ընտրություններն է խոստացել եվրոպական պաշտպանական հիմնադրամի պլան ներկայացնել:
Նախկինում Յունկերը հայտարարել է, որ եվրոպական բանակի ստեղծումն անխուսափելի է, քանի որ ԱՄՆ-ը հետագայում հազիվ թե մտահոգվի Եվրոպայի անվտանգության մասին:
