Նոյեմբերի 23-24-ին Ժնեւում Խոշտանգումների դեմ ՄԱԿ-ի կոմիտեն իր 59-րդ նստաշրջանում քննարկեց Խոշտանգումների եւ այլ դաժան, անմարդկային կամ արժանապատվությունը նվաստացնող վերաբերմունքի կամ պատժի դեմ ՄԱԿ-ի կոնվենցիայի կատարման վերաբերյալ Հայաստանի Հանրապետության 4-րդ պարբերական զեկույցը։ Այս մասին NEWS.am-ը տեղեկանում է ԱԳՆ մամուլի ծառայությունից: Հայաստանի պատվիրակությունը, որի կազմում ընդգրկված են եղել ՀՀ արդարադատության, արտաքին գործերի նախարարությունների, ոստիկանության, դատախազության, հատուկ քննչական ծառայության, քննչական կոմիտեի, ինչպես նաեւ Ժնեւի ՄԱԿ-ի գրասենյակում ՀՀ մշտական ներկայացուցչության ներկայացուցիչները, ղեկավարում էր ՀՀ արդարադատության նախարարի տեղակալ Արտակ Ասատրյանը:
Զեկույցի դիտարկումն անցել է Կոմիտեի անդամների հետ բաց եւ կառուցողական երկխոսության մթնոլորտում, որի ընթացքում քննարկվել է Կոնվենցիայում ամրագրված իրավունքների իրականացման ընթացքը: Կոմիտեն դրական է գնահատել ՀՀ չորրորդ զեկույցը սահմանված վերջնաժամկետից շուտ ներկայացնելու փաստը:
Պատասխանելով Կոմիտեի անդամների հարցադրումներին՝ ՀՀ պատվիրակությունը ներկայացրել է այս ոլորտում վերջին չորս տարիների դրական զարգացումները, ինչպես նաեւ ընթացիկ ռազմավարական ծրագրերը եւ ձեռնարկվող քայլերը՝ ոլորտը ՀՀ ստանձնած միջազգային պարտավորություններին համապատասխանեցնելու ուղղությամբ: Մասնավորապես անդրադարձ է կատարվել 2015 թվականի հունիսին ընդունված օրենսդրական փաթեթին, ինչի արդյունքում Քրեական օրենսգրքում տրված սահմանումը համապատասխանեցվել է Կոնվենցիայի առաջին հոդվածին, մանրամասն պատասխաններ են տրվել հարուցված քրեական գործերի ընթացքի վերաբերյալ:
Կոմիտեի անդամները տեղեկացվել են նաեւ ս.թ. ապրիլին Ադրբեջանի կողմից սանձազերծված լայնածավալ ռազմական գործողությունների հետեւանքով միջազգային հումանիտար իրավունքի կոպիտ խախտումների` քաղաքացիական անձանց թիրախավորելու, խոշտանգումների եւ սպանությունների մասին:
