Համատեղության կարգով Լատվիայում ՀՀ դեսպան Տիգրան Մկրտչյանն այսօր՝ նոյեմբերի 29-ին, (նստավայրը՝ ք. Վիլնյուս) իր հավատարմագրերն է հանձնել Լատվիայի Հանրապետության նախագահ Ռայմոնդս Վեյոնիսին:
ԱԳՆ-ից NEWS.am-ին հայտնում են, որ հավատարմագրերի հանձնման արարողությանը հաջորդած զրույցի ընթացքում քննարկվեցին Հայաստան-Լատվիա հարաբերություններին եւ դրանց առավել խորացմանն առնչվող հարցեր: Դեսպան Մկրտչյանը ներկայացրեց առաջիկայում նախատեսվող ծրագրերը:
Նախագահ Վեյոնիսը կարեւորեց երկկողմ հարաբերություններում տնտեսական բաղադրիչի ակտիվացումը՝ այդ համատեքստում առանձնահատուկ ընդգծելով հայ-լատվիական միջկառավարական հանձնաժողովի ձեւաչափի կարեւորությունը:
Զրուցակիցները նաեւ անդրադարձան ՀՀ-ԵՄ նոր շրջանակային համաձայնագրի շուրջ բանակցությունների ընթացքին՝ միաժամանակ հույս հայտնելով, որ այն կստորագրվի մոտ ապագայում:
Լատվիայի նախագահը եւ Հայաստանի դեսպանը մտքեր փոխանակեցին մի շարք հրատապ տարածաշրջանային եւ միջազգային խնդիրների շուրջ: Անդրադառնալով ղարաբաղյան հակամարտությանը՝ դեսպան Մկրտչյանը շնորհակալություն հայտնեց Լատվիայի` հիմնահարցի առնչությամբ հավասարակշռված մոտեցման կապակցությամբ, եւ ընդգծեց ԵԱՀԿ Մինսկի խմբի եռանախագահության ձեւաչափին միջազգային հանրության աջակցության կարեւորությունը: Նախագահ Վեյոնիսը վերահաստատեց հակամարտությունը ԵԱՀԿ Մինսկի խմբի համանախագահության ձեւաչափում խաղաղ բանակցությունների միջոցով կարգավորելու Լատվիայի դիրքորոշումը:
