Կուրսանտ Հայկազ Բարսեղյանին սպանությունից ժամեր առաջ ծեծելու գործով նիստերն անընդհատ հետաձգվում են:
Մեկ տարի առաջ Երեւանի Ավան եւ Նոր Նորք վարչական շրջանների ընդհանուր իրավասության դատարան ուղարկված այս գործով ընդամենը 3 նիստ է կայացել, նշանակված մեկ տասնյակից ավելի նիստերը տարբեր պատճառաբանություններով հետաձգվել են:
«Մինչեւ դատաքննության փուլի մեկնարկը՝ մենք միջնորդեցինք արագացված կարգով դատաքննություն իրականացնել, որից հետո նիստը հետաձգվեց եւ առ այսօր որեւէ նիստ տեղի չի ունեցել: Եթե հենց մեկ նիստ էլ կայանա, դատավճռի հրապարակումը նույնիսկ կլինի, որովհետեւ արագացված կարգով է լինելու, սակայն անհասկանալի պատճառներով հետաձգվում են աընդհատ նիստերը»,- NEWS.am-ի հետ զրույցում ասաց գործով մեղադրյալ Կարեն Բաղրամյանի փաստաբան Ռուզաննա Սիրեկանյանը:
ՉԻ բացառվում, որ դատարանը սպասում է Հայկազ Բարսեղյանի սպանության գործով դատավճռին:
Ըստ մեղադրական եզրակացության՝ կուրսանտ Կարեն Բաղրամյանը հունվարի 28-ին ժամը 07:40-ի սահմաններում ննջարանը մաքրելու հարցի շուրջ վիճաբանել է համածառայող Հայկազ Բարսեղյանի հետ: Այս ընթացքում, խախտելով ՀՀ ԶՈՒ ներքին ծառայության կանոնագրքի 13-րդ, 16-րդ և 65-րդ հոդ. կանոնագրքային կանոնները,Կարենը բռնության գործադրմամբ հարվածներ է հասցրել Հայկազի մարմնի տարբեր մասերին:
Բացի դրանից նույն օրը ժամը 13:00-ի սահմաններում իր հանգիստը խանգարելու հարցի շուրջ, Կարենը բռնության գործադրմամբ հարվածներ է հասցրել Հայկազ Բարսեղյանի մարմնի տարբեր մասերին:
Կարեն Բաղրամյանին մեղադրանք է առաջադրվել Քրեական օրենսգրքի 359-րդ հոդվածի 1-ին մասով:
Հիշեցնենք, որ Հայկազ Բարսեղյանի սպանության գործով դատաքննությունն արդեն սկսվել է: Ամբաստանյալի աթոռին են հայտնվել նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Կուրսանտներն իրենց մեղավոր չեն ճանաչում: