Կենտրոնական զինվորական հոսպիտալում մահացել է 20-ամյա զինծառայող Նարեկ Ասատրյանը: Երիտասարդի հոր՝ Վլադիկ Ասատրյանի խոսքով, որդին մահացու վիրավորում է ստացել հուլիսի 16-ին՝ զորացրվելու նախորդ օրը, խրամատում ականի պայթյունի հետեւանքով: Վեց ամիս անց, գիտակցության չգալով, տղան մահացել է: Նարեկ Ասատրյանն ապրիլյան պատերազմի մասնակից էր: Նա Կոտայքի մարզի Կարենիս գյուղից էր, ընտանիքի միակ զավակը: Հոր խոսքով՝ այս ընթացքում պաշտպանության նախարարությունն իրենց ընդամենը 100 հազար դրամ է տրամադրել, որպեսզի ծնողները կարողանան Երեւան գալ՝ որդուն տեսության: Հայրն առաջարկել է նաեւ տանել արտերկիր՝ բուժման, բայց ասել են, որ եթե տեղաշարժեն, կմահանա:
Կառավարությունում այսօր նիստ չէր, բայց վարչապետ Կարեն Կարապետյանը խորհրդակցության էր կանչել նախարարությունների եւ գերատեսչությունների ղեկավարներին: Զեկուցել են վերջին երկու ամիսների ընթացքում կատարված աշխատանքը: Նախ՝ վարչապետն ավետել է. դեկտեմբերին գործադիրն արտակարգ ռեժիմով է աշխատելու:
Տնտեսական զարգացման եւ ներդրումների նախարարը զեկուցել է. գործարար միջավայրի հետ երկխոսության, ներդրումային ծրագրերի հավաքագրման հարթակ են ստեղծել: Արդեն իսկ 6 ներդրումային ծրագիր են ստացել: Վարչապետին հստակություն էր պետք: Սուրեն Կարայանն ասել է, որ զգալիորեն ակտիվացել է ադամանդագործության ոլորտը, հնարավոր է դարձել ավելի որակյալ ու մատչելի հումք ձեռք բերել: Մի քանի կազմակերպությունների էլ օգնել են, որ առանց խնդիրների մուտք գործեն ԵՏՄ շուկա:
Առողջապահության ոլորտում ակտիվորեն օպտիմալացում են կատարում: Վերջնական արդյունքում 1.8 մլրդ դրամ կտնտեսենք: Բացի այդ, վերանայվել են դժվարամատչելի, սոցփաթեթով տրամադրվող ծառայությունների գները, նպատակ ունեն նվազեցնել դրանք: Արտեմ Սարգսյանը խնդիր է տեսնում հաշմանդամության կենսաթոշակների մասով: Նախարարությունը հունվարին պիլոտահաշվառման նոր մոդել է ներկայացնելու, փորձելու են ամեն ինչ անել, որպեսզի քաղաքացիներն ավտոմատ թոշակառու չդառնան: Կարեն Կարապետյանը վճռական է տրամադրված նաեւ սոցիալապես անապահովության համար գումար հատկացնելու հարցում:
Կրթության ոլորտի մասին. դպրոցական կանոնակարգերում լրացումներ են կատարվել՝ ուղղված տնօրենների ընտրությունների թափանցիկության բարձրացմանը: Քայլեր են կատարվում նաեւ հանրակրթության համակարգում բիզնես կրթություն եւ սոցիալական ձեռնարկատիրություն դասավանդելու, ավագ դպրոցների ծրագրերի արմատական բեռնաթափման ուղղությամբ: Այս դեպքում նույնպես վարչապետը կոնկրետ ծրագրեր է պահանջել:
Քաղավիացիայի գլխավոր վարչության պետն էլ զեկուցել է բյուջետային ավիաընկերությունների մասին: Դեկտեմբերից Գյումրիից կսկսի չվերթներ իրականացնել ռուսական «Պոբեդա»-ն: Սերգեյ Ավետիսյանը տեղեկացրել է, որ 2016 թվականին ուղեւորահոսքերի ռեկորդային ցուցանիշ կարձանագրվի՝ ավելի քան 2 մլն մարդ: Ընդ որում՝ աճը պայմանավորված է ներգնա հոսքերի ավելացմամբ:
Մոսկվա-Երեւան ավտոբուսի վթարի հետեւանքով տուժած 26-ամյա Սմբատ Պողոսյանը Բեսլանից տեղափոխվել է Հայաստան: Նա Բեսլանի ավտովթարից տուժած վերջին ուղեւորն էր, այս պահին գտնվում է Վանաձորի բժշկական կենտրոնում: NEWS.am-ի հետ զրույցում Սմբատ Պողոսյանը պատմել է, որ վթարի պահին քնած է եղել եւ չի տեսել՝ ինչպես է տեղի ունեցել պատահարը: 26-ամյա երիտասարդը Բեսլանի բուժկենտրոնում ստացած բուժօգնությունից դժգոհություններ չունի, այնտեղ իրեն լավ են վերաբերվել եւ անմիջապես կազմակերպել բոլոր հետազոտությունները:
Մանրամասներ «Ջունգլ» մականունով հայտնի Գեւորգ Սարգսյանի դանակահարության մասին: Մեր տեղեկություններով՝ դեպքը տեղի է ունեցել Աբովյան քաղաքի «Քրեյզի» գիշերային ակումբում: Տերյան փողոցում կնոջը ծեծելուց հետո Ջունգլը շտապել է գիշերային ակումբ, որտեղ վեճի է բռնվել ակումբում գտնվողներից մեկի հետ: Այդ ընթացքում էլ դանակի հարվածներ է ստացել: Նրան դանակահարելու մեջ կասկածվում է «Չեչեն» մականունով Աբովյանի բնակիչը: Հավելենք, որ կնոջը ծեծելու փաստով Գեւորգ Սարգսյանի դեմ քրեական գործ է հարուցվել: Կինը տուժող է ճանաչվել, իսկ Սարգսյանի նկատմամբ որպես խափանման միջոց է ընտրվել չհեռանալու մասին ստորագրությունը: Նա հրաժարվել է ցուցմունք տալ: Հիշեցնենք, որ «Ջունգլ»-ին մեղադրում էին նաեւ ազատամարտի մասնակից, 52-ամյա Վարդան Թումանյանին ծեծելով սպանելու մեջ:
78 տարեկանում կյանքից հեռացել է ֆիզիկոս, ակադեմիկոս Յուրի Չիլինգարյանը: Նա մեծ ներդրում ունի լազերային ֆիզիկայի եւ ոչ գծային օպտիկայի նոր ուղղությունների ասպարեզում: Գիտական գործունեությունը սկսել է ավելի քան 50 տարի առաջ՝ Երեւանի պետհամալսարանի ֆիզիկայի ֆակուլտետում: Մասնակցել է Հայաստանի առաջին լազերի հավաքմանն ու թողարկմանը: 2009 թվականին արժանացել է Հայաստանի գիտության վաստակավոր գործչի կոչման:
Նոյեմբերի 29-ին դոլարի փոխարժեքը հատել է 480 դրամի սահմանը: Այսպիսով, դոլարի փոխարժեքը կազմել է 480 դրամ, եվրոյինը՝ 508, ռուբլունը՝ 7 դրամ 39 լումա, ֆունտինը՝ 598 դրամ։
Նոյեմբերի 30-ին հանրապետությունում սպասվում է առանց տեղումների եղանակ: Օդի ջերմաստիճանն էականորեն չի փոխվի: Երեւանում նույնպես վաղը տեղումներ չեն սպասվում:
