Հայաստանում ուզում են հավաստագրել բազալտից թեթեւ ու ուժեղ դիէլեկտրիկը։ NEWS.am-ի թղթակցին «Օնիգս ԳԸ» ՓԲԸ-ի տնօրեն Գագիկ Կիրակոսյանն ասել է, որ բազալտային մանրաթելերից շինարարական խողովակները, որոնք արտադրում է ընկերությունը, փորձարկում են անցնում Էներգետիկ ենթակառուցվածքների ու բնական ռեսուրսների նախարարության «Էներգակարգաբերում» ՓԲԸ-ում։
Նմուշները դիմացել են 1 մմ-ի վրա 600 վոլտ լարմանը, որի դեպքում նույնիսկ օդն է հաղորդիչ դառնում։ Արդյունքը կրկնվել է նաեւ այն բանից հետո, երբ նմուշները 2 օր պահել եմ բաց օդին, նկատեց Կիրակոսյանը։
Շինարարական խողովակները, որոնցից կարելի է հավաքել հեծաններ ու ծածկեր, արտադրվում են պուլտրուզիայի մեթոդով, որը նոր է ոչ միայն Հայաստանի, այլեւ նրա 4 հարեւան երկրների համար։
Բազալտի հիմքով պատրաստված կոնստրուկցիաները կորոզիայի չեն ենթարկվում, ի տարբերություն մետաղների։ Դրանք քառակի թեթեւ են պողպատից ու կրկնակի ամուր ձգելիս։ Այսպիսով, մենք արտադրում ենք նյութ, որը կարելի է գործածել երկրային մթնոլորտից դուրս։ Նման նյութ ստանալու հանձնարարություն էր տվել դեռ Լեոնիդ Բրեժնեւը 60-ականներին։ Խորհրդային գիտնականները ու կոնստրուկտորները կանգ էին առել բազալտային կոնստրուկցիաների վրա։ Եվ ահա հիմա դրանք ամբողջովին արտադրվում են Հայաստանում մի քանի ընկերություններում, այդ թվում մեր։ Իհարկե աշխարհում միայն մենք չենք դա արտադրում, բայց տարածաշրջանային չափանիշներով մեր տեխնոլոգիան նոր է»,- նկատեց նա։
Բազալտից պոլտրուզիոն շիննյութերի հավաստագրումից հետո ընկերությունը մտադիր է դիմել շինարարական նորմերի մշակման համար ՝դրանք շինարարության մեջ գործածելու համար։ «Նման նյութերի համար շինարարական նորմեր եւ կանոններ Ռուսաստանում էլ չկան, չնայած նման նյութեր այնտեղ էլ են պատրաստում։ Բայց հետագայում մենք ուզում ենք այդ նորմերի ընդունման համար դիմել արդեն ԵՏՄ մակարդակի վրա, որպեսզի ավելի հեշտ արտահանենք այնտեղ»,- ամփոփեց Գագիկ Կիրակոսյանը։