Մենք կողմնակից են գործնական եւ տեսանելի արդունքներով գործակցությանը եւ երկկողմ գործակցության էլ ավելի ամրապնդմանը: Այս մասին, այսօր՝ դեկտեմբերի 1-ին, ՀՀ գլխավոր դատախազ Արթուր Դավթյանի հետ հանդիպման նշել է Հայաստանում ԱՄՆ արտակարգ եւ լիազոր դեսպան Ռիչարդ Միլսը:
Գլխավոր դատախազությունից NEWS.am-ին հայտնում են, որ Արթուր Դավթյանը բարձր է գնահատել ԱՄՆ դեսպանության հետ ձեւավորված բազմակողմ համագործակցությունը` պատրաստակամություն հայտնելով այն դարձնել առավել դինամիկ եւ ընդգրկուն: Արթուր Դավթյանը նշել է այն առաջնահերթությունները, որոնք գերակա են դատախազության համար, ընդգծելով, մասնավորապես, քաղաքացիական հասարակության ներկայացուցիչների հետ համագործակցությունը, վերջիններիս ներգրավվածությունը դատախազության տարբեր ծրագրերի իրականացման աշխատանքներում:
Անդրադառնալով կոռուպցիայի դեմ պայքարում իրականացվող միջոցառումներին՝ ՀՀ գլխավոր դատախազը նշել է, որ այդ արատավոր երեւույթի դեմ թիրախավորված պայքարը շարունակական է, եւ ներկայումս էլ այդ նպատակով հստակ ուղղություններ են ակտիվացվում:
Դեսպան Ռիչարդ Միլսը, ողջունելով կոռուպցիայի դեմ պայքարում դատախազության կողմից իրականացվող աշխատանքները, պատրաստակամություն է հայտնել շարունակելու համագործակցությունը այդ ուղղությամբ:
Ռիչարդ Միլսը հավաստիացրել է, որ շարունակելու են առավելագույն ջանքեր գործադրել մինչ օրս կատարված աշխատանքի արդյունքում արձանագրված լուրջ ձեռքբերումները պահպանելու եւ երկկողմ գործակցությունն ավելի ամրապնդելու համար:
Դեսպանը վերահաստատել է դատախազության կողմից իրականացվող բարեփոխումներին աջակցությունը շարունակելու պատրաստակամությունը, ընդգծելով, որ իրենք եւս կողմնակից են գործնական եւ տեսանելի արդունքներով գործակցությանը եւ երկկողմ գործակցության էլ ավելի ամրապնդմանը:
Հանդիպմանը քննարկվել է դատաիրավական ոլորտին վերաբերող հարցերի լայն շրջանակ, պայմանավորվածություն է ձեռք բերվել կոնկրետ ուղղություններով համագործակցության առավել ակտիվացման վերաբերյալ: