Չինաստանում դատարանը անմեղ է ճանաչել տղամարդուն, ով 21 տարի առաջ մահապատժի է ենթարկվել բռնաբարության եւ սպանության մեղադրանքով: Այս մասին հայտնում է «Սինհուա» գործակալությունը:
Նե Շուբինը մահապատժի է ենթարկվել 1995 թվականին, երբ 21 տարեկան էր:
Նա կալանավորվել է 1994-ի հոկտեմբերի 1-ին, նրան մեղադրել են Հեբեյ նահանգի Շիցզյաչժուան քաղաքի բնակչուհու վրա հարձակվելու համար, որը տեղի է ունեցել նույն տարվա օգոստոսի 5-ին եգիպտացորենի դաշտում: 1995-ի մայիսի կեսին դատարանը նրան մահվան է դատապարտել: Նա վճիռը բողոքարկել է, սակայն այն անփոփոխ է թողնվել, եւ Նե Շուբինի մահապատիժն ի կատար է ածվել:
10 տարի հետո՝ 2005 թվականի հունվարի 18-ին, սերիական բռնարար եւ մարդասպան Վան Շուցզինը խոստովանել է, որ Շիցզյաչժուանի բնակչուհու վրա հարձակումը նույնպես ինքն է կատարել: Դատարանը նրան մահվան է դատապարտել, նա վճիռը բողոքարկել է, որը մինչ օրս քննարկվում է: