Կոլումբիայում կործանված օդանավի երկրորդ օդաչուն՝ բոլիվիացի մոդել Սիսի Արիասը, վթարի օրը առաջին չվերթն էր իրականացնում ուղեւորատար օդանավով, հայտնում է El Colombiano պորտալը։
Պորտալի փոխանցմամբ Արիասը ԱՄՆ-ում էր սովորել քաղաքացիական ավիացիայի օդաչու մասնագիտացումով։ Որոշ լրատտվամիջոցների տեղեկություններով բոլիվիական LaMia ավիաընկերության չվերթը, որը երեքշաբթի վթարի է ենթարկվել, նրա գործնական աշխատանքի մի մասն էր։
Օդանավը կործանվել էր Մեդելյինից 50 կմ հեռավորության վրա։ Օդանավում 77 մարդ կար՝ անձնակազմի ինը անդամները ու 68 ուղեւոր, այդ թվում բրազիլական «Շակեկոենսե» ակումբի ֆուտբոլիստները, որոնք Մեդելյին էին ուղեւորվում՝ Հարավամերիկյան գավաթի եզրափակիչ խաղին։ Ավիավթարից հետո ողջ մնացածները վեցն են, նրանցից երեքը ֆուտբոլիստներ Ալան Ռուշելը, Ջեքսո Ֆոլմանը ու Խելիո Սամպյեր Նետոն։
Պորտալի փոխանցմամբ 29-ամյա աղջիկը սկզբում ուզում էր ուրիշ ավիաընկերությունում աշխատանքի անցնել, սակայն չէր անցել նախընտրական փուլը։ «Հարցազրույցի ժամանակ նա ասել էր, որ երկու երեխաներ ունի, իսկ այդ ընկերությունների մոտեցումն այն է, որ եթե մարդը որեւէ բանի հետ ուժեղ կապվածություն ունի՝ ուրեմն իրենց չի համապատասխանում։ Նրանց ավելի հարմար է աշխատանքի ընդունել մարդկանց, ովքեր օդանավի ղեկի մոտ նստած՝ ոչնչի մասին մտահոգվելու պատճառ չեն ունենա»,- ասել էր աղջկա հայրը, բոլիվիացի հայտնի լրագրող Խորխե Արիասը։ Մերժում ստանալով՝ Արիասը դիմել էր մեկ այլ ավիաընկերության։ «Մենք պատրաստ ենք լավագույնս սպասարկել չվերթը»,-ասել էր աղջիկը չվերթից առաջ։ Արիասը զոհվել էր ավիավթարի հետեւանքով։
