Խորհրդարանական ընտրություններին մասնակցելու ձեւաչափը ընտրություններից չորս ամիս առաջ հստակեցրել է երեք ուժ։ Նախօրեին հայտարարվեց Նիկոլ Փաշինյանի «Քաղաքացիական պայմանագիր», Էդմոն Մարուքյանի «Լուսավոր Հայաստան» եւ Արամ Սարգսյանի «Հանրապետություն» կուսակցությունների միասնական դաշինքի մասին։ Մինչդեռ սպասվում էր, որ այս թեւում կընդգրկվեին Աժ պատգամավոր Խաչատուր Քոքոբելյանի «Ազատ դեմոկրատներ» եւ «Ժառանգություն» կուսակցությունները եւ այն արեւմտամետ թեւը կհամարվեր ամբողջացած։
Շրջանառվող տեղեկությունների համաձայն հնարավոր է՝ «Ազատ դեմոկրատները» դաշինք կազմեն նախկին վարչապետ, պատգամավոր Հրանտ Բագրատյանի «Ազատություն» կուսակցության հետ։ Խոսվում է «ժառանգության» եւ նախկին արտգործանախարար Վարդան Օսկանյանի «Համախմբում» կուսակցության հնարավոր դաշինքի մասին։ Առհասարակ, «Ժառանգության» ճակատագիրն անորոշ է եւ որոշ քաղաքական գործիչներ այն պայմանավորում են կուսակցության առաջնորդ Րաֆֆի Հովհաննիսյանի փոփոխական, պայմանավորվածությունները խախտելու բնավորությամբ։
Ի դեպ ընդհանուր հայտարարի գալու, միասնական դիրքորոշման շուրջ կոնսոլիդացվելու անհրաժեշտություն կա նաեւ կուսակցության ներսում։ Որոշ տեղեկությունների համաձայն՝ այստեղ կարապի խեցգետնի, գայլաձկան պատմությունն է։ Ամեն մեկն իր դիրքորոշումն է պնդում։ Պատգամավոր Զարուհի Փոստանջյանը ծայրահեղ մոտեցման կողմնակից է, իսկ կուսակցության փոխնախագահ Արմեն Մարտիրոսյանը՝ այլ ուժերի հետ համախմբվելու եւ միասնական մասնակցելու։
Արմեն Մարտիրոսյանը NEWS.am-ի հետ զրույցում վստահեցրեց, որ իր եւ Փոստանջյանի միջեւ հակասություն չկա, կուսակցության խորհուրդը նիստ է հրավիրել եւ սահմանել ուղենիշներ, որոնցով էլ առաջնորդվում են։ Ինչ վերաբերում է Փաշինյանի, Սարգսյանի եւ Մարուքյանի դաշինքին չմիանալուն, Արմեն Մարտիրոսյանն ասաց. «Ժառանգությունը» որեւէ կուսակցության միանալու ցանկություն չունի եւ չի էլ պատրաստվում։ «Ժառանգությունն» ասում է՝ բոլորով իրար միանանք, լայն կոնսոլիդացիա լինի, մեկ ճակատով պայքարենք Հայաստանում արմատական փոփոխությունների համար, որը պետք է սկսի իշխանափոխությունից։ Մեր նպատակը դա էր, եւ այն քննարկումները, որ այժմ տեղի են ունենում դրա շուրջ են»։
Թե որ ուժերի հետ են բանակցությունները շարունակվում եւ որքանով է հավանական, որ կհաջողվի ի վերջո իրենց դաշինք կազմել որեւէ ուժի հետ, Մարտիրոսյանը փակագծերը չբացեց․ «Առայժմ անուններ չեմ կարող տալ, ավելի խորը չեմ կարող ասել»։
Կուսակցության առաջնորդ Րաֆֆի Հովհաննիսյանի ընտրական ցուցակում լինելու հարցը ասաց՝ չի քննարկվել։ Նա կվերադառնա հաջորդ շաբաթ եւ շատ հարցեր կորոշակիանան։