Այսօր մեկնարկել է «Զինված խմբի» աղմկահարույց գործով դատավարությունը: Առաջին նիստը մեկ ժամ ուշացումով է սկսվել. չէին սպասում, որ մեծ թվով լրագրողներ եւ ամբաստանյալների հարազատներ կգան: Եթե հարազատներին կարողացել են համոզել եւ ներս է մտել ընդամենը 11 մարդ, լրագրողներին համոզել չի ստացվել. բոլորը, թեեւ կանգնած, մասնակցել են դռնբաց դատական նիստին:
Ամբաստանյալներից Վահան Շիրխանյանը լուրջ առողջական խնդիրների պատճառով նիստին չէր ներկայացել: Գործով նաեւ նոր հանրային պաշտպաններ էին ներգրավվել, որոնք նույնպես ժամանակ են խնդրել՝ 37 հատորանոց նյութերին ծանոթանալու համար: Դատարանը որոշել է նիստը հետաձգել մինչեւ հունվար: Նշենք, որ նիստը տեւել է ընդամենը 10 րոպե: Լրագրողները հնարավորություն են ունեցել մի քանի հարց ուղղել խմբի ենթադրյալ պարագլուխ Արթուր Վարդանյանին: Նա, ի դեպ, բարձր տրամադրություն ուներ, իսկ հեռանալուց առաջ միասնության կոչ է արել: Ըստ մեղադրանքի՝ խումբը մտադիր է եղել զինված հարձակում գործել պետական հաստատությունների վրա, իշխանափոխություն անել, սակայն ավարտին չի հասցրել. 2015 թվականի նոյեմբերին հայտնաբերվել է Ազգային անվտանգության ծառայության կողմից: Գործով 20 ամբաստանյալ կա, այդ թվում՝ ազատամարտիկներ:
Արցախում վիրավորված զինծառայողների վիճակը կայուն ծանր է: Կենտրոնական զինվորական հոսպիտալի պետի տեղեկացմամբ, Երեւան են տեղափոխվել ժամկետային զինծառայող 19-ամյա Կարապետ Միքայելյանը եւ 24-ամյա Քաջիկ Բադալյանը: Արամ Ասատուրյանը նշել է նաեւ, որ Կարապետ Միքայելյանը գլխի թափանցող վիրավորում է ստացել, Քաջիկ Բադալյանը՝ որովայնի թափանցող, գնդակային վիրավորում, վնասվել են նրա աղիները եւ աջ ազդրը: Վիրավորված մեկ այլ զինծառայող՝ 32-ամյա Գագիկ Պողոսյանը, Ստեփանակերտի հոսպիտալում է: Գագիկ Պողոսյանն ու Քաջիկ Բադալյանն Արցախի Աշան գյուղից են:
Իսկ նոյեմբերի 22-ին Արցախի մարտական դիրքերում վիճաբանության ժամանակ, նախնական տվյալներով, ծառայակցի կողմից հրազենային վիրավորում ստացած Ազնավուր Բալեյանի վիճակը շարունակում է մնալ ծայրահեղ ծանր: Նա վերակենդանացման բաժանմունքում է, անգիտակից վիճակում: Բալեյանը գլխի շրջանում հրազենային վնասվածք ունի: Զինծառայողը Գեղարքունիքի Ծովազարդ գյուղից է, մեկ ամսից զորացրվելու է: Ազնավուր Բալեյանին վիրավորում հասցնելու կասկածանքով ձերբակալվել է նրա ծառայակից Ա.Ներսեսյանը:
Դեկտեմբերի 1-ի լույս 2-ի գիշերը ղարաբաղա-ադրբեջանական շփման գծի գրեթե բոլոր ուղղություններով հակառակորդը խախտել է հրադադարի ռեժիմը: Հայկական կողմը կորուստներ չունի: Հայկական դիրքերի ուղղությամբ ավելի քան 2000 կրակոց է արձակվել: Միաժամանակ, Արցախի պաշտպանության բանակի տեղեկացմամբ, ապատեղեկատվություն է ադրբեջանական կողմի տարածած լուրերը, իբր, ղարաբաղա-ադրբեջանական սահմանի արեւելյան ուղղությամբ տեղի ունեցած «դաժան մարտերի ընթացքում» հայկական կողմը տվել է 1 զոհ եւ 9 վիրավոր: Այս պահի դրությամբ սահմանային իրավիճակը հանգիստ է:
Սոթքի ոսկու հանքավայրում կեսգիշերին մոտ կրակոցներ են հնչել: Մի տղամարդ կրակոցներ արձակելով փորձել է ներխուժել «Գեո Պրո Մայնինգ Գոլդ» ընկերությանը պատկանող ոսկու հանքի տարածք: Անվտանգության աշխատակիցը՝ Սոթք գյուղի 35-ամյա բնակիչ Յուրի Մելնիկինը, ոտքի շրջանում հրազենային վնասվածքով հիվանդանոց է տեղափոխվել: Հարձակվողը՝ Վարդենիսի 31-ամյա բնակիչ Վահագն Մանուկյանը, զինաթափվել եւ ձերբակալվել է, նրա ԱԿՄ տիպի ինքնաձիգն առգրավված է:
Դանակահարություն Երեւանում: Մալաթիա-Սեբաստիա վարչական շրջանի բնակիչ, 30-ամյա Հարություն Վանյանը դանակի վնասվածքներով հիվանդանոց է տեղափոխվել: Նա բժիշկներին ասել է, որ վնասվածքները ստացել է Գրիգոր Լուսավորիչ եկեղեցու հարեւանությամբ գտնվող Լունապարկում, սակայն դեպքի իրական հանգամանքների մասին ոչինչ չի հայտնել: Հավելենք, որ Վանյանը նախկինում դատապարտված է եղել:
Կրթության նախարարին մտահոգում է «Փոքր Մհեր» ռազմական կրթահամալիրի սաների դժգոհությունը նորանշանակ տնօրենից: Ըստ Լեւոն Մկրտչյանի, եթե 6 տարվա ընթացքում 5-6 տնօրեն է փոխվում, նշանակում է` մի բան այն չէ: Հիշեցնենք, որ կրթահամալիրի սաները դժգոհում են նորանշանակ տնօրենի կոպիտ վերաբերմունքից, հաստատությունում տիրող անառողջ մթնոլորտից: Նախարարը, միաժամանակ, հիշեցնում է, որ այս կրթահամալիրում սոցիալապես անապահով ընտանիքների երեխաներ են սովորում, նրանց նկատմամբ պետք է առավել զգույշ ու նրբանկատ լինեն: Հավելենք, որ այսօր Լեւոն Մկրտչյանի նախաձեռնությամբ կրթահամալիրի կառավարման խորհրդի արտահերթ նիստ է հրավիրվել: Քննարկվել է ստեղծված իրավիճակը, նաեւ որոշվել է փոխել կրթահամալիրի կանոնադրությունը, խորհրդի կազմը եւ կառավարման ձեւը:
Լրագրողների հետ հանդիպմանը Լեւոն Մկրտչյանն անդրադարձել է նաեւ երեխաների շրջանում սուր շնչառական վիրուսներով եւ գրիպով հիվանդանալու դեպքերին: Ասում է՝ դասերը դադարեցնելու անհրաժեշտություն չկա: Նախարարի հավաստմամբ՝ հիվանդությունների պատճառով դպրոցականներին արձակուրդ տալու որոշումը, իհարկե, իրենք են կայացնում, սակայն առողջապահության նախարարության հետ խորհրդատվության արդյունքում:
Դեկտեմբերի 2-ին դոլարի ու եվրոյի վերելքը շարունակվել է: Արդյունքում դոլարի փոխարժեքը կազմել է 480 դրամ, եվրոյինը՝ 511, ռուբլունը՝ 7 դրամ 48 լումա, ֆունտինը՝ 605 դրամ։
Դեկտեմբերի 3-ին հանրապետության առանձին շրջաններում քամու ուժգնացում է սպասվում: Շրջանների մեծ մասում տեղումներ կլինեն, լեռնային եւ նախալեռնային շրջաններում՝ ձյուն: Օդի ջերմաստիճանն էականորեն չի փոխվի: Երեւանում նույնպես վաղը տեղումներ կլինեն. բարձրադիր վայրերում՝ թաց ձյուն, ցածրադիր գոտիներում՝ ձնախառն անձրեւ:
