Կուսակցությունների խոշորացումը կեղծ կատեգորիա է եւ չի կարող լինել կուսակցությունների քաղաքական որակները բարձրացնելու ճանապարհ: Այս մասին այսօր՝ դեկտեմբերի 2–ին, լրագրողների հետ հանդիպման ժամանակ ասաց «Հայաստանի քրիստոնեա-դեմոկրատական միություն» կուսակցության նախագահ Խոսրով Հարությունյանը՝ անդրադառնալով քաղաքական կուսակցությունների գրանցումը պարզեցնող՝ «Կուսակցությունների մասին» օրենքի նոր նախագծի շուրջ քննադատություններին։
«Ընդհանրապես, կուսակցությունների խոշորացումը քաղաքական կեղծ թեզ է՝ ռեսուրսները փոշիացնող: Հիմա մենք գործում ենք, ու՞մ ենք խանգարում: Յուրաքանչյուրի սահմանադրական իրավունքն է զբաղվել քաղաքականությամբ»,- ասաց նա:
Խոսրով Հարությունյանի կարծիքով՝ նույնիսկ առաջարկվող՝ կուսակցությունների գրանցումն ազատականացնող օրենքում սահմանափակումները չափազանց են։
«Օրինակ՝ ինչու պետք է գրանցման պահին կուսակցության անդամների թիվը 1000 լինի, կամ՝ կուսակցությունը ներկայացված լինի մարզերի 1/3-ում»,– դժգոհեց պատգամավորը:
Խոսրով Հարությունյանը կուսակցությունների քաղաքական որակները բարձրացնելու այլ ճաապարհներ է առաջարկում՝ ապահովել միջկուսակցական մրցակցություն եւ ներկուսակցական ժողովրդավարություն։
«Ժամանակին մենք առաջարկել են օրինագիծ ընդունել, որ ազդեցիկ կուսակցությունները մինչեւ ընտրություն հրապարակեն իրենց կաբինետի կազմը»,– ասաց նա՝ նշելով, որ սա կմեծացնի ապագա պաշտոնյաների հաշվետվողականությունը ընտրողների առջեւ։