Ադրբեջանի գլխավոր դատախազությունը նախազգուշացրել է Politika.az լրատվական պորտալին։
contact.az-ի փոխանցմամբ, ըստ դատախազության մամուլի հաղորդագրության, նախազգուշացման պատճառն այն է, որ Politika.az պորտալը հրապարակել է «իրականությանը չհամապատասխանող տեղեկություններ այն մասին, որ երկրի հասարակայնությունն իբրեւ դեմ է 2016-ի նոյեմբերի 28-ին Սակագնային խորհրդի ընդունած որոշմանը՝ գազի ու էլեկտրաէներգիայի գների կարգավորման մասին»։ Պորտալին մեղադրում են «Լրատվամիջոցների մասին» օրենքի պահանջները խախտելու ու երկրի սոցիալ տնտեսական բարեփոխումները վատաբանելու համար։
Դատախազության կարծիքով պորտալի հաղորդագրությունն այն մասին, որ Սակագնային խորհրդի որոշումը կհանգեցնի բնակչության տնտեսական վիճակի վատացման ու սննդամթերքի ու այլ ապրանքների, նաեւ ծառայությունների գների բարձրացման, ոչ այլ ինչ է, քան զանգվածային բողոքի ցույցեր հրահրելու միտում։
Վերոնշյալի կապակցությամբ լրատվական պորտալի ղեկավարին հրավիրել են դատախազություն ու պահանջել դադարեցնել իրականությանը չհամապատասխանող տեղեկությունների հրապարակումը։ Կայքի ղեկավարին նախազգուշացրել են, որ օրենքով նախատեսված ավելի խիստ քայլեր կձեռնարկեն, եթե շարունակեն նման տեղեկություններ տարածել։
Politika.az -ն հստակ քաղաքական դիրքորոշում չունեցող ինտերնետային պարբերական է, որը հրապարակում է քննադատական նյութեր տարբեր մակարդակների չինովնիկների մասին։