Analitik.am  կայքը երբեւէ  չի տնօրինվել խմբով, քաղաքացուց առանձնապես խոշոր չափի շորթում կատարելու մեղադրանքով կալանավորված Արտակ Գալստյանի «Վանոյի Արտակ» կողմից, այն պատկանել է եւ պատկանում է Անի Հովհաննիսյանին: Այս մասին այսօր՝ դեկտեմբերի 3-ին, NEWS.am-ի հետ զրույցւոմ ասաց Անի Հովհաննիսյանի շահերի պաշտպան Լիպարիտ Սիմոնյանը՝ նշելով, որ Արտակ Գալստյանն ու Անի Հովհաննիսյանը որեւէ գործնական կապ իրար հետ չեն ունեցել: Լիպարիտ Սիմոնյանի խոսքով՝ Անի Հովհաննիսյանն ու նրա եղբայրը՝ Գոռ Հովհաննիսյանը, երբեւէ չեն հարցաքննվել՝ Արտակ Գալստյանի կողմից գումար (կաշառքի կամ այլ տեսքով) ուզելու վերաբերյալ, մինչ դեռ Արտակ Գալստյանի մեղադրական եզրակացության մեջ նշված է, որ Արտակ Գալստյանը խաբեության եւ վստահությունը չարաշահելու եղանակով խոշոր չափի գույք հափշտակելու նպատակով իր ծանոթ՝ շորթում կատարելու կասկածանքով ձեռբակալված Անի Հովհաննիսյանի եղբորը դրդել է իր միջոցով 5000 ԱՄՆ դոլար կաշառք տալ՝ իբր իրավասու պաշտոնատար անձին:

Նշենք, որ ըստ մեղադրական եզրակացության` Արտակ Գալստյանը խաբեության եւ վստահությունը չարաշահելու եղանակով խոշոր չափի գույք հափշտակելու նպատակով իր ծանոթ՝ շորթում կատարելու կասկածանքով ձեռբակալված Անի Հովհաննիսյանի եղբորը դրդել է իր միջոցով 5000 ԱՄՆ դոլար կաշառք տալ՝ իբր իրավասու պաշտոնատար անձին, սակայն իր կամքից անկախ հանգամանքներով հանցանքներն ավարտին չեն հասցրել, քանի որ Գոռ Հովհաննիսյանը հրաժարվել է վճարել պահանջված գումարը:

Արտակ Գալստյանին մեղադրանք է առաջադրվել Քրեական օրենսգրքի 35-312-րդ հոդվածի 3-րդ մասի 1-ին կետով, 34-178-րդ հոդվածի 2-րդ մասի 2-րդ կետով: Նա կալանավորված է:

Գործը քննվելու է Ավան եւ Նոր Նորք վարչական շրջանների ընդհանուր իրավասության դատարանում:

Հիշեցնենք, որ ՀՀ հատուկ քննչական ծառայությունը հայտարարություն էր տարածել, որ Արտակ Գալստյանը ձերբակալվել է 2015թ. աշնանը analitik.am կայքի տնօրենի հետ, նախնական համաձայնությամբ, խմբով, քաղաքացուց առանձնապես խոշոր չափի շորթում կատարելու կասկածանքով: Նախաքննությամբ ձեռք բերված տվյալներով՝ Ա. Գալստյանը տնօրինում եւ կազմակերպում է ինչպես «analitik.am», այնպես էլ՝ «crimenews.am», «armcrimenews.com» լրատվական կայքերի գործունեությունը: