Սարի թաղում հուլիսի 19-ի դեպքերով հարուցված քրեական գործի շրջանակում կալանավորված Էդուարդ Զեյթունյանը առողջական լուրջ խնդիրներ ունի: Այս մասին NEWS.am-ի հետ զրույցում ասաց նրա շահերի պաշտպան Լիպարիտ Սիմոնյանը՝ նշելով, որ այդ վիճակում Էդուարդին հակացուցված է գտնվել անազատության մեջ։
Լիպարիտ Սիմոնյանը նշեց, որ այս քրական գործով դատական նիստերի անընդհատ հետաձգումը կապված է բազմաթիվ միջնորդությունների քննարկման հետ։
«Դատական նիստերն հիմնականում նշանակվում են շամը 16։00–ի սահմանում եւ միշտ այնպես է ստացվել, որ ամեն մի նիստին գոնե մի միջնորդություն է եղել, որը դատարանը խորհրդակցական սենյակում պարտավոր էր քննել։ Եվ քանի որ դատավորը համարյա մի ժամից ավելի խորհրդակցական սենյակում է գտնվել, աշխատանքային ժամը լրանալուց հետո բնական է, որ հետաձգվել են նիստերը»,–ասաց նա։
Հիշեցնենք, որ ըտ մեղադրական եզրակացության՝ Սարի թաղի բնակիչներ Հարություն Թորոսյանը, Հրայր Իսախանյանը, Անդրանիկ Քյոսեյանն ու Էդուարդ Զեյթունյանը 2016թ․ հուլիսի 19-ին ժամը 20.00-ի սահմանում Մովսես Խորենացի փողոցին հարող` Գլինկա եւ Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ:
Նրանց մեղադրանք է առաջադրվել Քրեական օրենսգրքի 316-րդ հոդվածի 2-րդ մասով: Բոլորն էլ կալանավորված են: Կալանավորվածների հարազատները մինչդեռ պնդում են՝ նրանք ընդամենը պահանջել են, որ իրենց հոսանքն ու ջուրը միացնեն, բացեն փակ ճանապարհները։