Շուրջ մեկ ամիս առաջ ձկնորսության դուրս գալուց հետո Սեւանա լճում կորած 25-ամյա Ամուր Կյուրեղյանի որոնողական աշխատանքներն այնքան էլ ինտենսիվորեն չեն իրականացվում: Այս մասին NEWS.am-ի հետ զրույցում ասաց Գեղարքունիքի մարզի Նորատուս գյուղի բնակիչներից Սեւակը` նշելով, որ երիտասարդին գտնելու հավանականությունն արդեն այնքան էլ մեծ չէ:
«Առաջվա նման ինտենսիվորեն չեն փնտրում, արդեն հույս չկա, որ կգտնեն: Ամեն օր էլ փնտրում են, բայց ոչ այնպես, ինչպես առաջին օրերին»,-ասաց նա:
Ամուր Կյուրեղյանը ձկնորսության էր դուրս եկել ընկերոջ` Արեւշատ Առաքելյանի հետ, որի դին փրկարարները գտել էին կորելուց 10 օր հետո:
Փրկարարները նոյեմբերի 6-ին Սեւանա լճում հայտնաբերել էին այն մոտորանավակը, որով նորատուսցի երկու երիտասարդ ձկնորսները դուրս էին եկել ձկնորսության:
Հիշեցնենք, որ Սեւանա լճում հոկտեմբերի 31-ին, կորած երկու ձկնորսները Գեղարքունիքի մարզի Նորատուս գյուղի բնակիչներ 25 եւ 24–ամյա Ամուր Կյուրեղյանը եւ Արեւշատ Առաքելյանն են: