Ադրբեջանի պետական անվտանգության ծառայությունը ահաբեկչական գործողություն է կանխել։ Հատուկ գործողության ընթացքում ոչնչացվել է մեկ մահապարտ ահաբեկիչ։ Այս մասին հայտնում է haqqin.az –ը, վկայակոչելով Ադրբեջանի ՊԱԾ հասարականության հետ կապերի բաժինը։
Ըստ աղբյուրի՝ ՊԱԾ-ի իրականացրած օպերատիվ քննչական միջոցառումների արդյունքում հաստատվել է, որ Ադրբեջանի քաղաքացի 1978 թ․ ծնված Ջամի Էմին Ազիզագա օղլուն, որին վնասազերծել էին 2007-ին ու դատապարտել Նաիֆ ալ Բադավիի ղեկավարությամբ ահաբեկչական խմբավորմանը մասնակցության համար , ազատ արձակվելուց հետո անդամակցել է մի ապօրինի ահաբեկչական խմբավորման, որը ռազմական գործողություններ է իրականացնում Ադրբեջանի սահմաններից դուրս, եւ ծրագրում էր ահաբեկչական գործողություն իրականացնել Ադրբեջանի տարածքում՝ հրազենի ու պայթուցիկ նյութերի կիրառումով։
Այդ կապակցությամբ դեկտեմբերի 3-ին «Բինա» առեւտրի կենտրոնի մոտ իրականացվել է հատուկ գործողություն՝ Էմին Ջամիին ձերբակալելու նպատակով։ Հանցագործը դիմադրություն է ցուցաբերել ու փորձել պայթեցնել իր «մահապարտի գոտին»։ Հատուկ նշանակության ջոկատը որպես պատասխան գործողություն տեղում ոչնչացրել է ահաբեկչին։ Քննչական օպերատիվ միջոցառումները շարունակվում են։