Գյումրեցի 22-ամյա Արթուր Տոնապատյանի ականջը կտրելու համար 3 տարվա ազատազրկման դատապարտված Արմեն Հարությունյանը համաձայն է առաջին ատյանի կայացրած որոշման հետ եւ հրաժարվել է վերաքննիչ բողոք ներկայացնել:
«Ընտանիքը նման որոշում կայացրեց, բացի դրանից, եթե վարքագիծը նորմալ լինի, 1/3-ով ազատ կարձակվի, այդ պատճառով որոշեցին չբողոքարկել, որ վճիռը մտնի ուժի մեջ»,- NEWS.am-ի թղթակցի հետ զրույցում ասաց ամբաստանյալի պաշտպան Հայկ Հարությունյանը:
Նշենք, որ տուժածի բուժման ամբողջ ծախսը հոգացել է մեղադրյալի ընտանիքը:
Ըստ մեղադրական եզրակացության՝ Արմեն Հարությունյանը 2016թ. փետրվարի 16-ին առավոտյան Շիրակի մարզի Առափի գյուղի վարչական տարածքում չգործող «Թաք ծառ» ռեստորանի բակի դարպասի դիմաց գտնվող հատվածում Արթուր Տոնապետյանի կողմից իր քրոջ`Եպրաքսյա Հարությունյանի բջջային հեռախոսահամարին զանգեր կատարելու աննշան պատճառով վիճաբանել է Արթուր Տոնապետյանի հետ: Վիճաբանության ժամանակ Արմեն Հարությունյանը, հաշվի չառնելով Արթուր Տոնապետյանի՝ իրենից բազմաթիվ անգամ ներողություն խնդրելու հանգամանքը, նրան ծնկի է բերել եւ գրպանից հանելով դանակ՝ այն շեղբի մասով մոտեցրել է Արթուր Տոնապետյանի կզակին, դանակով կտրել է Արթուր Տոնապետյանի աջ ականջը՝ պատճառելով աջ ականջախեցու տրավմատիկ անդամահատման եւ պարանոցի կտրած վերքի ձեւով առողջության տեւական քայքայումով միջին ծանրության վնաս:
Արմեն Հարությունյանին մեղադրանք է առաջադրվել Քրեական օրենսգրքի 113-րդ հոդվածի 2-րդ մասի 5-րդ եւ 6-րդ կետերով: Նա կալանավորված է: