Ամուսնու ենթադրյալ սիրուհուն առեւանգելու եւ նրանից շորթում կատարելու մեջ մեղադրվող վանաձորցի կինը դատապարտվեց 2 տարվա ազատազրկման եւ տուգանվեց 500 հազար դրամով: Դատարանը, սակայն, որոշում է կայացրել պատիժը պայմանականորեն չկիրառել՝ նշանակելով փորձաշրջան:
Ըստ մեղադրական եզրակացության՝ Քրիստինեն Քնարիկին կասկածել է ամուսնու հետ սիրային կապ ունենալու մեջ: Ապրիլի 25-ին Քրիստինեն խաբեությամբ Քնարիկին նստեցրել է իր մեքենան, առեւանգել եւ տարել Վանաձորի ծայրամաս: Ճանապարհին Քրիստինեն վիրավորել եւ սպառնացել է, որ «գլուխն ուտելու» է, տուն չի հասնելու: Այնուհետեւ Քրիստինեն ապտակել է Քնարիկին եւ պահանջել 100 հազար դրամ՝ ասելով, թե իբր իր ամուսնուն, իսկ վերջինիս միջոցով նաև իրեն սեռավարակով վարակել: Գիտակցելով որ Քնարիկն այդքան գումար չունի, Քրիստինեն իջեցրել է պահանջվող գումարի չափը՝ մինչեւ 30 հազար դրամ: Քնարիկը գտել է գումարը, այն տվել Քրիստինեին, որից հետո միայն թույլ է տվել իջնել մեքենայից:
Լոռու մարզի ընդհանուր իրավասության դատարանը մեղավոր է ճանաչել Քրիստինեին եւ դատապարտել 2 տարվա ազատազրկման, սակայն որոշել է պատիժը պայմանականորեն չկիրառել: Քրիստինեն պարտավորվել է նաեւ 500 հազար դրամ տուգանք վճարել:
Քրիստինեն, համաձայն չլինելով դատավճռի հետ, վերաքննիչ բողոք է ներկայացրել՝ պահանջելով արդարացնել իրեն: