Մենք պետք է կարողանանք կրթել Հայաստանի քաղաքացիներին, որ խորհրդարանական ընտրությունների ժամանակ իրենց քվեները պահեն: Այս մասին այսօր` դեկտեմբերի 5-ին, հրավիրված մամուլի ասուլիսի ժամանակ ասաց «Արդարություն Հայաստանում» նախաձեռնության անդամ, կանադահայ կինոռեժիսոր Ատոմ Էգոյանը` անդրադառնալով իրենց նախաձեռնությանը, որով ապրիլին Հայաստանում դիտորդական առաքելություն կիրականացնեն սփյուռքահայերը:
«Սփյուռքահայությունը պետք է գիտակցի իր պատասխանատվությունը, հասկանա իր դերակատարությունը: Մենք պետք է կարողանանք կրթել Հայաստանի քաղաքացիներին, որ ճիշտ քվեարկեն: Հայաստանի քաղաքացիներն իրենք պետք է ցանկանան, որ կրթվեն` ճիշտ քվեարկելու եւ իրենց քվեն պահելու համար: Մենք էլ այդ հարցում պետք է նրանց օգնենք»,- ասաց նա:
Ատոմ Եգոյանի խոսքով` հուլիսյան իրադարձություններն ահազանգ էին բոլորի համար, մասնավորապես, մարդկանց ապօրինի ձերբակալությունները, իրավունքների ոտնահարումներն ապացուցեցին, որ պետք է լինել միասնական. «Մենք ուզում ենք ցույց տալ, որ պատրաստ ենք գործուն մասնակցություն ունենալ, մենք, իհարկե, չենք կարող քվեարկել, սակայն նրանք, որոնք երկքաղաքացիություն ունեն, պետք է գան եւ քվեարկեն: Սա շատ կարեւոր պահ է մեզ համար, որպեսզի մեր հայրենակիցներին ցույց տանք, որ մենք միասնական ենք»:
