Ադրբեջանի նախագահ Իլհամ Ալիեւի հայտարարությունները չեն կարող լուրջ ընկալվել։ Դրանք իրական գործողությունների վրա չեն ազդում։ Այս մասին դեկտեմբերի 5-ին՝ մամուլի ասուլիսի ժամանակ, ասել է Կովկասի ինստիտուտի տնօրեն քաղաքագետ Ալեքսանդր Իսկանդարյանը։
Անդրադառնալով Հայաստանի նկատմամբ Ալիեւի տարածքային նկրտումներին՝ քաղաքագետն ասաց. «Ադրբեջանական վերնախավը կարծում է, որ իրենք պետք է միշտ ինչ–որ կտրուկ բառեր ասեն, որպեսզի ադրբեջանական հասարակության մեջ որոշակի վստահություն պահպանեն։ Նրանք ժամանակ առ ժամանակ նման մի բան են ասում։ Հասկանալի է, որ նման հայտարարություններ ուղղված են ներքին լսարանին»,– ասել է նա։