«The Times-ին հայտնի է դարձել, որ ԵՄ-ն ֆինանսական աջակցություն է առաջարկում Սիրիային, որի ղեկավարը դեռ նախագահ Ասադն է։ Դա պատերազմի ելքի վրա արեւմտյան ազդեցությունը պահպանելու վերջին փորձն է»,- գրում է Ռիչարդ Սփենսերը The Times պարբերականում։
«Հալեպի մոտ մարտերը մոտենում են հանգուցալուծման, ու ասում են, որ ԵՄ չինովնիկները գիտակցել են, որ Ասադի հրաժարականի մասին Արեւմուտքի կողմից մինչ այդ ներկայացվող պահանջները անիրատեսական են։ Աճում է այն զգացողությունը, որ Ամերիկան՝ որպես բանակցությունների հարցում արեւմտյան գործընկեր, երկրորդ պլան է մղվել,- շարունակում է Սփենսերը,- Դրա փոխարեն ԵՄ արտաքին քաղաքականության ղեկավար Ֆեդերիկա Մոգերինին է ընդդիմադիր առաջնորդներին նոր առաջարկներ արել երկու շաբաթ առաջ կայացած հանդիպման ժամանակ։ Որպես բոլոր կողմերի համար շահավետ տարբերակ, նա առաջարկում է օգնություն ու ներդրումներ»։
«Այս առաջարկները համապատասխանում են ՄԱԿ-ի բանաձեւերին, որոնք կոչ են անում Սիրիայում քաղաքական անցում ապահովել։ Միացյալ Նահանգները, Մեծ Բրիտանիան ու Ֆրանսիան միշտ աջակցել են սիրիական ընդդիմությանը ու «քաղաքական անցում» արտահայտությունը նշանակում է Ասադի հեռացում նախագահի պաշտոնից, սակայն հիմա այդ «անցման» ճշգրիտ նշանակության քննարկումը հետաձգվել է»,- գրում է հեղինակը։
«ԵՄ առաջարկները նախատեսում են իշխանության փոխանցումը Սիրիայի նահանգներին։ Դա թույլ կտար չափավոր խռովարարների զորքերին ինտեգրվել անվտանգության տեղական մարմիններին։ Իշխանության կենտրոնական կառույցները կմնային անփոփոխ, չնայած ժամանակի ընթացքում կհայտնվեին ավելի մեծ ժողովրդավարակա հսկողության ներքո։ Ասադի ապագայի հարցը չի հիշատակվում»,- ասվում է հոդվածում։
«Մոգերինին ուզում է առաջարկել հակամարտության կարգավորման ԵՄ-ի ծրագիրը,- ասել է սիրիական ընդդիմությանը մոտ կանգնած աղբյուրը,- Խոսքն անցումի մասին է, սակայն մանրամասները աղոտ են։ Իսկ եթե բոլոր կողմերը համաձայնեն ու անեն այնպես, ինչպես ԵՄ-ն է առաջարկում, նրանք մեծ գումարներ կստանան»։
Եվրոպական դիվանագետները հաստատել են գործարքի ընդհանուր ուվագծերը։ Հոդվածագրի խոսքով ԵՄ-ն շահագրգռված է դադարեցնել սիրիական ճգնաժամը, քանի որ Սիրիայի վերականգնումը միակ միջոցն է դադարեցնել սիրիացիների փախուստը, հետեւաբար նաեւ՝ միգրացիոն ճգնաժամի խորացումը Եվրոպայում։