Քաղաքականությունը վերադառնալը Ծառուկյանի սահմանադրական իրավունքն է: Այս մասին այսօր՝ դեկտեմբերի 5-ին, ԱԺ-ում լրագրողների հետ զրույցում նշել է ՀԱԿ խմբակցության ղեկավար Լեւոն Զուրաբյանն՝ անդրադառնալով Գագիկ Ծառուկյանի քաղաքականություն վերադարձին:
ԲՀԿ-ի հետ ՀԱԿ-ի հնարավոր համագործակցության վերաբերյալ Զուրաբյանը հիշեցրել է իրենց հայտարարությունը, որտեղ նախանշված են համագործակցության սկզբունքները. «Մենք պատրաստ ենք համագործակցել այն քաղաքական ուժերի հետ, որոնք ընտրությունների միջոցով նպատակ են դրել Հայաստանում հասնել իշխանափոխության, լեգիտիմ ընտրության: Նման ուժերի հետ մենք նպատակ ենք դրել համագործակցել»:
Ինչ վերաբերում է կուսակցության ղեկավար Նաիրա Զոհրաբյանի պնդումներին, որ կհամագործակցեն միայն ԲՀԿ-ի քաշի ուժի հետ, ՀԱԿ խմբակցության ղեկավարն ասաց. «Կառաջարկեի այդ քաշային կատեգորիաների հետ հաշվի չնստել, մարդիկ կան, որ դիետայի են նստում, մարդիկ կան, որ հատուկ նիհարում են սպորտային ֆորմայի մեջ լինելու համար: Էդ քաշային քննարկումները ավելորդ են, ավելի կարեւոր է ուղերձը, վճռականությունը եւ ժողովրդի սպասելիքները»:
Հարցին՝ Ծառուկյանի վերադարձը վտանգավոր չէ՞ ընդդիմության համար՝ ընտրազանգվածին տիրանալու առումով, Զուրաբյանը պատասխանեց. «Հասկացա հարցի ենթատեքստը.... ոչ ոք իրավունք չունի անհանգստանալու, վախենալու, խառնվելու այլ քաղաքացիների սահմանադրական իրավունքի իրացման առիթով»: