Եթե Սեւծովյան տնտեսական համագործակցության կազմակերպության քաղաքական եւ իրավական հարցերով հանձնաժողովի նախագահության իրավունքը տրամադրվել է Ադրբեջանի պատվիրակին, ապա դա նշանակում է, որ պետք է դրսեւորվի կամայական մոտեցում կամ նրանք պետք է առաջ մղեն իրենց շահերը: Այս մասին այսօր՝ դեկտեմբերի 5-ին, մամուլի ասուլիսում հայտարարեց «Բարգավաճ Հայաստան» խմբակցության քարտուղար Վահե Էնֆիաջյանը:
Անդրադառնալով ՍԾՏՀԿ Խորհրդարանական վեհաժողովի 48-րդ լիագումար նիստի շրջանակներում ծավալված սկանդալին՝ պատգամավորն ասաց, որ ՍԾՏՀԿ քաղաքական ու իրավական հարցերով եւ սոցիալական հարցերով հանձնաժողովների աշնանային նիստերի ընթացքում հայկական պատվիրակությունը 2 զեկույց է պատրաստել: «Մենք ներկայացրել ենք Հայաստանի շուկան եւ հնարավոր տնտեսական ներդրումների համար մթնոլորտը, եւ երկիրը՝ որպես կայուն պետություն, ահաբեկչության սպառնալիքի տեսակետից համեմատելով ՍԾՏՀԿ այլ անդամ երկրների հետ: Տարածաշրջանում ահաբեկչական, կրոնական խնդիրների քննարկման ընթացքում ադրբեջանցի պատվիրակն իր զեկույցում նշեց, որ արդեն մոտ 25 տարվա ընթացքում Ադրբեջանը կորցրել է իր տարածքները, այդպիսով, ըստ էության, հայկական կողմին մեղադրելով: Մենք, բնականաբար, գրանցվեցինք, որպեսզի հարցը բարձրացնելու եւ համապատասխան պատասխան տալու հնարավորություն ունենանք: Սակայն գլխավոր քարտուղարը եւ հանձնաժողովի նախագահը Ադրբեջանի ներկայացուցիչներ էին, որոնք մեզ համարժեք պատասխանով ելույթ ունենալու հնարավորություն չտվեցին»,- նշեց Էնֆիաջյանը:
Նա այնուհետեւ շարունակեց, որ հաջորդ օրը ՍԾՏՀԿ սոցիալական հարցերով հանձնաժողովի նիստի ընթացքում ինքը կարողացել է ելույթ ունենալ: «Սակայն իմ ելույթի ամբողջ ընթացքում ինչպես Հանձնաժողովի ադրբեջանցի նախագահը, այնպես էլ Ադրբեջանի պատվիրակը ինձ պարբերաբար ընդհատում էին՝ փորձելով իրականությունն աղավաել: Այդուհանդերձ, ես բարձրացրեցի 1988 թվականին Սումգայիթի ջարդերի հարցը, ներկայացրեցի Ռամիլ Սաֆարովի գործողությունները եւ 2016-ի ապրիլյան վերջին իրադարձությունները: Դրա համար շատ կարճ ժամանակ էր հատկացվել, այդուհանդերձ 11 երկրների պատվիրակները ադրբեջանական կողմի գործողությունները անընդունելի բնութագրեցին»,- ամփոփեց Վահե Էնֆիաջյանը:
Հիշեցնենք, որ ընթացիկ տարվա դեկտեմբերին Բելգրադում ՍԾՏՀԿ-ում Սերբիայի նախագահության շրջանակներում տեղի է ունեցել ՍԾՏՀԿ Խորհրդարանական վեհաժողովի 48-րդ լիագումար նստաշրջանը: