ԱՄՆ-ում ոստիկանությունը ձերբակալել է այն գողին, որը փորձում էր ռեստորան մտնել օդահեռացման խողովակի միջոցով, բայց արգելափակվել էր այնտեղ, հայտնում է UPI գործակալությունը։
Դեպքը տեղի է ունեցել Նյու Յորք նահանգի Ռոչեսթեր քաղաքում։ Տեղի բնակիչները լսել են խողովակում մնացած տղամարդու բղավոցը ու ոստիկանություն են կանչել։ Իրավապահները հայտնաբերել են կասկածյալին պիցերիայի կտուրի վրա՝ խողովակի մեջ։ Գողին այնտեղից հանելու համար ստիպված են եղել հրշեջների օգնությանը դիմել։
Հրշեջ ծառայության պետի տեղակալի խոսքով կողոպուտը ձախողվել է այն պատճառով, որ դեպի ռեստորանի խոհանոց տանող խողովակը աստիճանաբար նեղանում էր։ Նա հավելել է որ 17 տարվա աշխատանքի ընթացքում առաջին անգամ է նման դեպքի ականատես եղել։
Կասկածյալն աննշան վնասվածք է ստացել։ Փրկելուց հետո նրան առաջին օգնություն են ցուցաբերել, հետո բանտ տարել։ Նրան մեղադրել են ապօրինի ներթափանցման, խուլիգանության ու գողության փորձի մեջ։