Ոստիկանի նկատմամբ կյանքի կամ առողջության համար ոչ վտանգավոր բռնություն գործադրելու մեջ մեղադրվող Վարդան Ենոքյանի նկատմամբ խափանման միջոց ընտրված կալանավորումն այսօր՝ դեկտեմբերի 5-ին, փոփոխվել է: Այս մասին NEWS.am-ի հետ զրույցում ասաց նրա շահերի պաշտպան Հայկազ Գալստյանը: Նա նշեց, որ առաջին ատյանի դատարանը բավարարել է իր պաշտպանյալին 800 հազար դրամ գրավի դիմաց ազատ արձակելու միջնորդությունը: Վարդան Ենոքյանը դեռեւս գտնվում է ՔԿՀ-ում, հարազատները դեռ չեն մուծել գրավի գումարը:
«Սպասում ենք, որ հարազատները գումարը մուծեն, դեռ չգիտեմ՝ ՔԿՀ-ից երբ ազատ կարձակվի, հենց գումարը մուծեն՝ ազատ կարձակվի»,-ասաց փաստաբանը:
Վարդան Ենոքյանը կալանքի տակ է 2016թ. օգոստոսի 12-ից:
Ավելի վաղ տեղեկացրել էինք, որ օգոստոսի 12-ին Կարբի Ձոր հանգստյան վայրում ընտանեկան խնջույքի ժամանակ 30-ամյա Վարդան Ենոքյանի եւ նրա կնոջ միջեւ վիճաբանություն էր ծագել, որի ժամանակ տղամարդը հայհոյել էր կնոջը:
Ոստիկանության աշխատակիցները մոտեցել են Վարդան Ենոքյանին, որի ժամանակ էլ ոստիկանի եւ Վարդան Ենոքյանի միջեւ քաշքուկ է տեղի ունեցել, որի ընթացքում տարածքում ծառայություն իրականացնող ոստիկանները հարվածել են նրան:
Վարդան Ենոքյանի հաղորդման հիման վրա ՀՔԾ-ում հարուցվել է քրեական գործ՝ ՀՀ քրեական օրենսգրքի 309-րդ հոդվածի 2-րդ մասով՝ Պաշտոնեական լիազորություններն անցնելը: