Վերջին երեք օրերին ավելի քան 20 մարդ է զոհվել Կոնգոյի Ժողովրդական Հանրապետության կենտրոնական մասի Չիկապ քաղաքի տարածքում զինվորականների ու ապստամբների միջեւ տեղի ունեցած բախումների ժամանակ։
«ՌԻԱ Նովոստիի» փոխանցմամբ, մարտերը շարունակվել են ուրբաթից կիրակի։ Կոնգոյում վերջին երկու տարիներին ավելի քան 700 մարդ է զոհվել հարձակումների հետեւ անքով։ Բենիում օգոստոսի 14-ին տեղի ունեցած հարձակումը, որի հետեւ անքով զոհվել էր 51 մարդ, զանգվածային բողոքի ակցիաներ էր առաջ բերել։ Բանակի տվյալներով հարձակումը ենթադրաբար իրականացրել են ADF–ի ապստամբները։ Միջադեպից մի քանի օր հետո՝օգոստոսի 17-ին, քաղաքի փողոցներ էին դուրս եկել հարյուրավոր բնակիչներ, որպեսզի իրենց բողոքն արտահայտեն իշխանությունների անգործության դեմ։ Ոստիկանությունը ցուցարարների դեմ արցունքաբեր գազ է կիրառել ու նախազգուշական կրակոցներ արձակել։ Զոհվել է առնվազն երեք մարդ։
