Ոստիկանությունը նոր մանրամասներ է հաղորդել Արարատի մարզի Խաչփառ գյուղում նոյեմբերի 30-ի գիշերը տեղի ունեցած դանակահարության մասին:
Պարզվում է` համագյուղացի երկու երիտասարդ վիճել են, միմյանց հայհոյել, վիճաբանությանը միջամտել էին այլ բնակիչներ, սակայն դանակահարությունը կանխել չէր հաջողվել: Տուժող երիտասարդին կտրած-ծակած վերքով տեղափոխել էին մայրաքաղաքի հիվանդանոցներից մեկը: Այստեղ արդեն իրավապահներին տուժողը վստահեցրել է, թե վնասվածքը ստացել է իրենց գյուղում ջրատարն ընկնելու հետեւանքով:
Ավելի ուշ Խաչփառ գյուղում հարցումների շնորհիվ ոստիկանները պարզել են, որ դանակահարությունը կատարել է նույն գյուղի բնակիչ Գուրգեն Ղլեչյանը: Վերջինս ոստիկանության բաժանմունքում պատմել է, որ վիճաբանությունը սկսել է այն բանից հետո, երբ ինքը մեքենան կայանել է տուժողի տան դիմաց: Վեճն այդ ժամանակ հարթվել էր, սակայն ժամեր անց կրկին էին պատահաբար հանդիպել եւ արդեն դիմել էր դանակի «օգնությանը»:
«Նորից սկսեցինք վիճել, չհասկացանք իրար եւ մի դանակով հարվածով հարվածեցի»,- պատմել է Գուրգեն Ղլեչյանը:
Փաստի առթիվ հարուցվել է քրեական գործ:
