Երեւանում ընթանում է Մարդու իրավունքների պաշտպանի աշխատակազմին կից ՔԿՀ-ներում խոշտանգումների կանխման հարցով փորձագիտական խորհրդի ընդլայնված նիստը: Նիստն անցկացվում է ԵԱՀԿ երեւանյան գրասենյակի աջակցությամբ: Նիստին մասնակցում են Արդարադատության նախարարության, ոստիկանության ներկայացուցիչներ:
Լրագրողների հետ զրույցում ՄԻՊ Արման Թաթոյանը նշեց, որ անցկացրած հետազոտություններով համակարգային խնդիրներ են բացահայտվել վաղաժամկետ ազատման ոլորտում եւ քրեակատարողական հիմնարկներում դատապարտյալների մահվան դեպքեր:
Օմբուդսմենի խոսքով՝ մարդու իրավունքների պաշտպանի աշխատակազմը խնդրի ուսումնասիրման արդյունքում օրենսդրական առաջարկներ է պատրաստել, որոնք կներկայացվեն Արդարադատության նախարարությանը, այնուհետեւ խորհրդարանին: Առաջարկների թվում են ընտանիքների հետ տեսակցության կազմակերպման հանդեպ վերաբերմունքի, ՔԿՀ-ների աշխատակիցների կողմից դատապարտյալների հանդեպ վերաբերմունքի, վաղաժամկետ ազատման համակարգի հանդեպ վերաբերմունքի վերանայումը:
Օմբուդսմենի գնահատմամբ՝ մայրաքաղաքում եւ մարզերում գտնվող ՔԿՀ-ների իրավիճակը իրարից քիչ է տարբերվում: «Խնդիրները համընդհանուր են եւ համակարգային»,- նշեց Արման Թաթոյանը: Նրա խոսքով՝ անհրաժեշտ է բարելավել ՔԿՀ-ների աշխատակիցների աշխատանքը: Այս ենթատեքստում նա նշեց աշխատակիցների աշխատավարձի ցածր չափը, ինչն իր հերթին կոռուպցիոն ռիսկեր է պարունակում, հիշեցրեց աշխատակիցների սոցիալ-տնտեսական երաշխիքների անհրաժեշտության, Արդարադատության նախարարության հետ համատեղ տրենինգների անցկացման մասին: