Amazon ընկերությունը 2017 թվականին Սիեթլում կբացի Amazon Go սննդամթերքի խանութը՝ առանց դրամարկղային սպասարկման եւ հերթերի, հայտնում է «ՌԻԱ Նովոստի»–ն՝ վկայակոչելով ընկերության պաշտոնական կայքը։
Գնումներ կատարելու համար անհրաժեշտ են սմարթֆոններ եւ դրանց վրա տեղադրված անվճար հավելվածներ։ Գնումներ կատարելու համար գնորդը պետք է ակտիվացնի հավելվածում QR-կոդը։ Դրանից հետո ծրագիրը հետեւում է, թե գնորդը ինչ ապրանքներ է ընտրում դարակների վրայից։
Ապրանքներ ընտրելուց հետո գնորդները կարող են «ուղղակի դուրս գալ» խանութից, իսկ գումարը ավտոմատ կերպով կհանվի նրանց քարտից, որը կապված է Amazon–ի հաշվին։ Ի տարբերություն այլ ինքնասպասարկման տեխնոլոգիաների՝ Amazon Go–ն չի պահանջում սքանավորել շտրիխ կոդը, դրա փոխարեն ընկերությունն օգտագործում է արհեստական ինտելեկտը եւ համակարգչային տեսողությունը, որպեսզի հասկանա, թե ինչ է գնում հաճախորդը, փոխանցում է CNBC–ն։