Քառօրյա պատերազմի ժամանակ արկակոծվող Թալիշից մի կերպ դուրս եկած եւ Չարենցավանում բնակություն հաստատած Պետրոսյանների 5 հոգանոց ընտանիքը պատրաստ չէ վերադառնալ Թալիշ: NEWS.am-ի հետ զրույցում ընտանիքի մայրը՝ Լուսինեն, նշեց, որ Թալիշում դեռ անվտանգ չէ եւ երեխաների հետ այնտեղ վերադառնալն անթույլատրելի է:
«Հայտարարում են, որ անվտանգ է, բայց չեմ կարծում: Ես երեք երեխա ունեմ եւ նրանց հետ էլի կրակի բերան վերադառնալն անթույլատրելի է: Եթե մեզ հետ երեխաներ չլինեին՝ միգուցե վերադառնայինք, բայց նրանց հետ ոչ Ալաշան կգնամ, ոչ էլ՝ Թալիշ»,-ասաց նա:
Լուսինեն նշեց, որ քառօրյա պատերազմի օրերին, երեխաները սթրես են տարել, որոնց ազդեցությունը մինչեւ այսօր էլ մնացել է. «Մինչեւ հիմա փոքր տղաս հոգեբանական ծանր վիճակում է եւ ո՞նց եք պատկերացնում, որ նրան վերցնեմ եւ նորից նույն տեղը վերադառնամ»:
Նրա խոսքով, Չարենցավանում բնակություն հաստատած թալիշցիների մեծ մասը եւս պատրաստ չէ վերադառնալ գյուղ՝ ինչքան էլ սիրեն գյուղը, գիտակցում են, որ իրենց ընտանիքների անվտանգությունն ապահովված չէ եւ ամեն վայրկյան կարող է կրկնվել այն՝ ինչ եղավ ապրիլյան պատերազմի օրերին:
Սակայն, NEWS.am-ի հետ զրույցում Թալիշի գյուղապետ Վիլեն Պետրոսյանը նշեց, որ ինքը համաձայն է ԼՂՀ անվտանգության խորհրդի քարտուղար Վիտալի Բալասանյանի այն հայտարարությանը, թե արդիականացված պաշտպանական համակարգը երաշխավորում է Արցախի բոլոր սահմանամերձ բնակավայրերի եւ, հատկապես, Թալիշ համայնքի անվտանգությունը: Սակայն, շատ թալիշցիներ կարծում են, որ Թալիշում անվտանգ չէ եւ կարող են նորից հայտնվել քառօրյա պատերազմի ժամանակ ստեղծված իրավիճակում:
«Երբ հարցը հասնի գյուղի վերաբնակեցմանը, արդեն այլ կերպ կլինի: Կան տարաձայնություններ՝ մարդիկ կան ցանկանում են, մարդիկ կան՝ ոչ: Բայց անհրաժեշտության դեպքում բոլորն էլ պատարստ են վերադառնալ: Բայց այս պահին կարեւորը ոչ թե գյուղի վերաբնակցման հարցն է, այլ՝ վերակառուցման: Պետք է պայմաններ լինեն՝ այնտեղ վերադառնալու համար»:
Վիլեն Պետրոսյանի խոսքով՝ Թալիշում շուտով մեկնարկելու է գյուղի վերակառուցման, վերականգման ծարգիրը, որի աշխատանքներին ներգրավվելու են նաեւ թալիշցի տղամարդիկ: Վերականգնվելու է գյուղի դպրոցը, գյուղապետարանը, մանկապարտեզը եւ տները. «Կսկսեն դպրոցի շենքից, վերակառուցվելու է նախկին հիվանդանոցի շենքը, կողքին կառուցվելու է գյուղապետարանի նոր շենքը, կկառուցվի հանդիսությունների սրահ, մանկապարտեզ եւ այլն: Նաեւ կկառուցվեն տներ»:
Նա նշեց, որ վերջին օրերի ընթացքում Արցախի սահմանամերձ Թալիշ գյուղ վերադարձած շուրջ 10 թալիշցի տղամարդիկ շարունակում են մնալ գյուղում, այս պահին Թալիշում իրավճակը հանգիստ է, կրակոցներ չկան:
«Գյուղում ամեն ինչ լավ է, հանգիստ է, կրակոցներ չկան: Գյուղում այս պահին եղած տղաներն իրենց կենցաղով ապրում են, շուտով շինարարական աշխատանքները մեկնարկելու են՝ կընդգրկվեն շինարարական աշխատանքներում, պաշտպանության բանակում եւ այլն: Նոր տարվա օրերին կվերադառնան Ալաշան, իրենց ընտանիքի, երեխաների հետ Նոր տարին անցկացնելու»:
Նշենք, որ ԼՂՀ անվտանգության խորհրդի քարտուղար Վիտալի Բալասանյանը ասել էր, որ այսօրվա արդիականացված պաշտպանական համակարգը երաշխավորում է, որպեսզի Արցախի բոլոր սահմանամերձ բնակավայրերի եւ, հատկապես, Թալիշ համայնքի անվտանգությունը լիովին ապահովված լինի:
Ավելի վաղ տեղեկացրել էինք, որ հուլիսի 25-ից թալիշցիները սկսել են բնակվել Մարտակերտի շրջանի Ալաշան ավանում, այս պահին այնտեղ է բնակվում շուրջ 28 թալիշցի ընտանիք՝ ընդհանուր 114 բնակիչ: Երեխաների համար Ալաշանում բացվել է նաեւ դպրոց, որտեղ սովորում է 23 աշակերտ: