Մենք հիմա կանգնած ենք մարտահրավերների առջեւ, որոնք հաղթահարելու համար ակնկալում ենք միջազգային կառույցների եւ արտասահմանյան գործընկերների, այդ թվում` նաեւ Պարենի եւ գյուղատնտեսության կազմակերպության աջակցությունը: Այս մասին, այսօր՝ դեկտեմբերի 6-ին, ՄԱԿ-ի պարենի եւ գյուղատնտեսության կազմակերպության (FAO) Եվրոպայի եւ Կենտրոնական Ասիայի երկրների տարածաշրջանային ներկայացուցչի տեղակալ, ՀՀ-ում ՊԳԿ ներկայացուցիչ Ռայմունդ Յելեի հետ հանդիպման ժամանակ նշել է ՀՀ գյուղատնտեսության նախարար Իգնատի Առաքելյանը:
Գյուղնախարարությունից NEWS.am-ին հայտնում են, որ ընդգծելով Հայաստանում առկա մեծ ներուժը գյուղատնտեսության ոլորտում եւ հաջող ու արդյունավետ համարելով ՊԳԿ աջակցությամբ իրականացվող ծրագրերը` պարոն Յելեն հաստատել է կազմակերպության պատրաստակամությունը շարունակել համագործակցությունը ՀՀ գյուղատնտեսության նախարարության հետ:
 |
Սպառողական վարկեր առանց գրավի մինչև 2,000,000 ՀՀ դրամ Մինչև դեկտեմբերի 30-ը «Մինչև 2,000,000 ՀՀ դրամ առանց գրավի սպառողական վարկերը» տրամադրվում են ավելի ցածր՝ ընդամենը 19-21% տարեկան տոկոսադրույքով: |
«Մենք հիմա կանգնած ենք մարտահրավերների առջեւ, որոնք հաղթահարելու համար ակնկալում ենք միջազգային կառույցների եւ արտասահմանյան գործընկերների, այդ թվում` նաեւ Պարենի եւ գյուղատնտեսության կազմակերպության աջակցությունը», - իր հերթին նշել է ՀՀ գյուղատնտեսության նախարար Իգնատի Առաքելյանը:
Այնուհետեւ նախարարը համառոտ ներկայացրել է ոլորտի առաջնահերթություններն ու գերակա խնդիրները` հատկապես կարեւորելով ինտենսիվ այգիների հիմնման, բնական պաշարների խնայողաբար օգտագործմամբ ձկնաբուծության զարգացման, ոռոգման կաթիլային համակարգերի եւ հակակարկտային ցանցերի ներդրման հարցերը: Անդրադարձ է կատարվել նաեւ երկրում գյուղատնտեսական կենդանիների հաշվառման եւ համարակալման իրականացման անհրաժեշտությանը:
Հանդիպման ավարտին ՀՀ գյուղատնտեսության նախարարության եւ ՄԱԿ-ի պարենի եւ գյուղատնտեսության կազմակերպության միջեւ ստորագրվել է «Երկրի առաջնահերթությունների ծրագրային շրջանակը» համաձայնագիրը, որով ՊԳԿ-ն աջակցություն կցուցաբերի ֆերմերների, անտառային տնտեսության մեջ զբաղվածների եւ ձկնաբույծների մրցունակության բարձրացմանը, ինչպես նաեւ գյուղական բնակավայրերում կենսամակարդակի բարելավմանը:
«Մենք կարեւորում ենք փոքր ֆերմերների եւ ընտանեկան գյուղացիական տնտեսությունների դերը Հայաստանում, եւ համաձայնագիրը ներառում է այնպիսի գործողություններ, որոնք ուղղված են այս խմբերի աջակցությանը: Միաժամանակ այս համաձայնագիրը կօգնի երկրին պահպանել բնական ռեսուրսները եւ բարելավել աղետներին արձագանքելու դիմակայունությունը» - նշել է պարոն Յելեն:
Համաձայնագիրը պատրաստվել է ՀՀ գյուղատնտեսության նախարարության, պետական այլ կառույցների, դոնոր կազմակերպությունների, այդ թվում՝ Եվրոպական միության, Ավստրիական զարգացման գործակալության, Շվեյցարիայի զարգացման եւ համագործակցության գործակալության, զարգացման ծրագրեր իրականացնող այլ գործընկերների, ներառյալ՝ ՄԱԿ-ի այլ գործակալությունների հետ անցկացված խորհրդակցությունների արդյունքում:
