Ապօրինի կերպով ծառայության չներկայանալու մեղադրանքով 2.5 տարվա ազատազրկման դատապարտված «Վարդաշեն» ՔԿՀ-ում գտնվող սպա Ցոլակ Խաչատրյանն արդեն 6-րդ օրը շարունակում է հացադուլը: Այս մասին այսօր՝ դեկտեմբերի 6-ին, ասաց NEWS.am-ի խմբագրություն զանգահարած Ցոլակ Խաչատրյանը՝ նշելով, որ հացադուլով հանդիպում է պահանջում ՀՀ Մարդու իրավունքների պաշտպանի եւ ՀՀ գլխավոր դատախազի հետ:
«Մինչ օրս ոչ ոք չի եկել ինձ մոտ, թքած ունեն եւ ինձ, եւ իմ առողջության վրա: Այս պահին առողջական վատ վիճակում եմ՝ խնդիրներ ունեմ սրտի եւ ճնշման հետ կապված: Բժիշկների հսկողության տակ եմ, բայց արդեն դա էլ չի օգնում»,-ասաց նա:
Ցոլակ Խաչատրյանը NEWS.am-ին պատմել էր, որ արդեն 2 տարի անազատության մեջ է՝ ծառայության վայրից արձակուրդ է գնացել, սակայն, արձակուրդի հրամանագրքի մեջ չգրանցելու պատճառով՝ դատապարտվել 2.5 տարվա ազատազրկման:
Ցոլակ Խաչատրյանը նշեց, որ իր հացադուլը շարունակելու է այնքան ժամանա, մինչեւ իր պահանջները չկատարվեն:
