Գարեգին Բ Ամենայն Հայոց Կաթողիկոսըն այսօր՝ դեկտեմբերի 6-ին, Մայր Աթոռ Սուրբ Էջմիածնում ընդունել է Վրաց Ուղղափառ Եկեղեցու Ախալքալաքի եւ Կումուրդոյի միտրոպոլիտ Նիկոլոզին` ուղեկցությամբ Սամցխե-Ջավախքի եւ Ծալկայի ընդհանուր առաջնորդական փոխանորդ Հոգեշնորհ Տ. Բաբկեն վարդապետ Սալբիյանի:
Մայր Աթոռի տեղեկատվական համակարգից NEWS.am-ին հայտնում են, որ Հայոց Հայրապետը, բարի գալուստ մաղթելով Նիկոլոզ միտրոպոլիտին համայն հայության հոգեւոր կենտրոն, ջերմությամբ վերհիշեց իր հայրապետական այցն Ախալքալաք, ինչպես նաեւ անդրադարձ կատարեց միտրոպոլիտի նվիրյալ գործունեությանը:
Այս կապակցությամբ Նորին Սրբությունը հաստատեց, որ այցի ընթացքում ականատեսն է դարձել հայ ու վրաց համայնքների եւ երկու Եկեղեցիների կառույցների միջեւ առկա ջերմ փոխհարաբերություններին եւ սերտ գործակցությանը, որոնցում կարեւոր է Գերաշնորհ Նիկոլոզ միտրոպոլիտի դերակատարությունը:
Խորին երախտագիտություն փոխանցելով Ամենայն Հայոց Կաթողիկոսին ընդունելության համար՝ միտրոպոլիտ Նիկոլոզն ուրախություն հայտնեց Հայաստան այցելելու հնարավորության համար: Ախալքալաքի եւ Կումուրդոյի միտրոպլիտը կարեւորեց երկու ժողովուրդների միջեւ շփումների ու կապերի զորացումը՝ ի մտի ունենալով նաեւ ժողովուրդների միջեւ առկա պատմական աղերսները, ընդհանրություններն ու համանման ավանդույթները:
Հանդիպմանը խոսվեց երկու Եկեղեցիների առջեւ ծառացած մարտահրավերների եւ դրանց հաղթահարմանն ուղղված ջանքերի մասին, անդրադարձ կատարվեց Եկեղեցիների հոգեւոր-կրթական գործունեությանը, մասնավորապես եկեղեցականների նոր սերնդի պատրաստությանը եւ հովվական ծառայությանը:
Վերջում Ամենայն Հայոց Կաթողիկոսը, վերստին գնահատելով Նիկոլոզ միտրոպոլիտի ջերմ վերաբերմունքը հանդեպ Հայ Եկեղեցին եւ Սամցխե-Ջավախքի հայությունը, Աստծու զորակցությունը մաղթեց նրան իր պատասխանատու առաքելության մեջ:
Հանդիպմանը ներկա էր նաեւ Մայր Աթոռի Արտաքին հարաբերությունների եւ արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը: